25 Naýryz, 2022 NEWS
Foto: Vıdeodan skrınshot
Bas prokýratýra memleket jáne qoǵam qaıratkeri Zamanbek Nurqadilovtiń qazasyn tergeýge baılanysty onyń uly Qaırat Nurqadilovtyń aryzy qaralyp jatqanyn málim etti.
Alaıda vedomstvo qylmystyq isti tergeý qaıta bastalǵany týraly aqparatty teristedi.
"Áleýmettik jelilerde Bas prokýratýranyń Zamanbek Nurqadilovtiń qaza bolý faktisi boıynsha qylmystyq isti tergeýdi qaıta bastaǵany týraly aqparat taralýda. Bas prokýratýra bul málimetterdiń shyndyqqa janaspaıtyndyǵyn habarlaıdy. Qaırat Nurqadilovtyń aryzy vedomstvomen qaralýda" delingen aqparattyq habarlamada.
Buǵan deıin Qaırat Nurqadilov ákesiniń qazasyn qaıtadan tergeý máselesin kóterip, bas prokýratýraǵa aryz jazǵanyn málim etken. Ol ákesiniń ólimine qatysty resmı nusqamen esh kelispeıtinin, onyń kisi qolynan qaza tapqanyna senimdi ekenin aıtqan.
– Ákem qaıtys bolǵanda polısııa departamenti is qozǵap, meni jábirlenýshi retinde qatystyrdy. Departamentke shaqyryp, qylmystyq is aıaqtalǵan soń tergeý qorytyndysyna óziń qol qoıasyń dedi. Men ákemdi óltirgenin bildim. Departamentten shyqqanymda palto kıgen eki jigit kútip aldy. Olardyń jáı adam emes ekenin, organda isteıtinin túsindim. Keldi de "Qaırat, ózin-ózi óltirdi degenge kelisesiń" dedi. Kelispeımin desem, olar "seni óltirý as úıde ushyp júrgen shybyndy óltirýden de ońaı, sen bizge problema emessiń" dep aıtty, – dep ákesiniń artynan júgiretin adam qalsyn degen nıetpen, ekinshi jaǵynan bala-shaǵasyn oılap amalsyz keliskenin jetkizgen.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir