Áýezov teatrynda premeralar aptalyǵy bastaldy

Búgin M.Áýezov atyndaǵy Qazaq ulttyq drama teatrynda «Premeralar aptalyǵy» bastaldy. Aptalyq 23-26 aqpan aralyǵynda ótedi. Osy tórt kúnde kórermenge bes jańa qoıylym jol tartady. Osyǵan oraı búgin sahna óneriniń búgingi  tańdaǵy ózekti máselelerin arqaý etetin  dóńgelek ústelder, semınarlar jáne leksııalar uıymdastyryldy.

Mádenı is-shara saǵat 17.00-de baspasóz konferensııasymen bastaldy. 2020 jyldyń 20 jeltoqsanynda QR Prezıdentiniń arnaıy Jarlyǵymen teatrǵa «Ulttyq» mártebesi berilgen bolatyn. Osyǵan oraı, konferensııa barysynda teatrdyń jańa logotıpi men jańa saıtynyń tanystyrylymy ótti.

Baspasóz konferensııasyna M.Áýezov atyndaǵy Qazaq ulttyq drama teatrynyń kórkemdik jetekshisi, KSRO Halyq artısi – A.Áshimov, M.Áýezov atyndaǵy Qazaq ulttyq drama teatrynyń dırektory, Qazaqstannyń eńbek sińirgen qaıratkeri – E.Jýasbek, «Qan men ter. Aqbala» tragedııasynyń qoıýshy-rejısseri – A.Ospanbaeva, «Qytaıdan jetken sálemdeme» dramasynyń qoıýshy-rejısseri – A.Qabdeshova, «Maqshar túngi mahabbat» mıstıkalyq dramasynyń qoıýshy-rejısseri – J.Jumanbaı qatysty.

Baspasóz-konferensııasy barysynda jańa qoıylymdardyń búgingi qoǵam úshin mańyzy, janry men stıldik erekshelikteri, akterlik quramy syndy máseleler talqylandy.

Saǵat 18.30-da qoıýshy-rejısser A.Ospanbaevanyń (avt. Á.Nurpeıisov)   «Qan men ter. Aqbala»  tragedııasynyń premerasy ótti.

24 aqpanda qoıýshy-rejısser A.Qabdeshovanyń «Qytaıdan jetken sálemdeme» (avt. R.Otarbaev) dramasynyń, 25 aqpanda qoıýshy-rejısser N.Qarabalınanyń «Beıtanys tanystar» (avt. A.Batyrqyzy) jáne qoıýshy-rejısser R.Jurynbaıdyń «Qaıdasyń, mama?!» (avt. J.Baýyrjanqyzy) monospektaklderiniń, 26 aqpanda qoıýshy-rejısser J.Jumanbaıdyń «Maqshar túngi mahabbat» (avt. D.Isabekov) mıstıkalyq dramasynyń premeralary shymyldyǵyn túredi.