"Biz qalaı bolsa da daıynbyz". NATO Reseıdiń talabyn toıtardy

Ýkraınanyń NATO-ǵa kirýine qarsy bolǵan Reseıdiń talabyn AQSh qabyldamady.

AQSh memlekettik hatshysy Antonı Blınken Reseıdiń Ýkraına daǵdarysyn sheshý jónindegi talaptaryna resmı jaýap berdi.

Blınken Máskeýge eshqandaı jeńildik bermedi, biraq ol "eger Reseı kelisse, eleýli dıplomatııalyq joldy" usynatynyn aıtty.

Reseılik tarap NATO-men kelise otyryp, Blınkenniń jaýabyn zertteıtinin aıtty.

Reseı NATO áskerı alıansynyń keńeıýine jáne qaýipsizdik máselelerine qatysty alańdaýshylyqtarynyń jazbasha tizimin jarııalady. Olardyń arasynda Ýkraına men basqa elderdi NATO-ǵa qospaý talaby boldy.

Sońǵy aptalarda Ýkraına shekarasy mańyna júz myńǵa jýyq reseılik sarbaz jınalýda. Batys elderi muny yqtımal shabýylǵa daıyndyq dep sanaıdy. Reseı muny joqqa shyǵarady.

Blınkenniń aıtýynsha, AQSh-tyń jaýaby Ýkraınanyń egemendigi men NATO sııaqty qaýipsizdik odaqtarǵa qosyla alý quqyǵyn aıqyn kórsetedi.

"Qalaı jaýap berý kerektigin Reseı sheshedi. Biz qalaı bolsa da daıynbyz" dedi ol.

Aıta keteıik, batys elderi Ýkraınaǵa shabýyl jasalǵan jaǵdaıda Reseı prezıdenti Vladımır Pýtınge tikeleı baǵyttalǵan sharalar týraly eskertken. Sonymen qatar olar bul qadamnyń Reseıge zardaby aýyr bolatynyn jarııalaǵan.