Almaty oblysy Úńgirtas aýylynda Mádenıet úıi ashyldy

Tuńǵysh Prezıdent kúni men Táýelsizdiktiń 30 jyldyǵynyń qurmetine Almaty oblysy Úńgirtas aýylynda aýyldyq mádenıet úıi ashyldy, dep habarlady Almaty oblysy ákiminiń baspasóz qyzmeti.

Saltanatty sharaǵa Jambyl aýdanynyń ákimi Nurlan Ertas pen aýdan jurtshylyǵy qatysty.

Aýdan ákimi aýyldyq mádenıet úıiniń ashylýy óńirdiń mádenı ómiri úshin jaqsy jańalyq ekenin atap ótti:

- Qurmetti qaýym! Qazaqstan Respýblıkasynyń Tuńǵysh Prezıdenti kúnimen jáne el táýelsizdiginiń 30 jyldyǵymen shyn júrekten quttyqtaımyn. Búgin, mine, Úńirtas aýylynda jańa mádenıet úıin ashyp otyrmyz. Endi munda merekelerge, jaqsy jańalyqtarǵa oraı, jastardy tárbıeleý baǵytynda ıgi sharalar turaqty ótkiziletin bolady. Osy qurylysty júrgizgen qurylysshylarǵa alǵys bildiremin, - dedi ol.

Aýyl turǵyndaryn merekemen Jambyl aýdanynyń Qurmetti azamaty Áskerbek Abaev pen «Ardagerler» uıymynyń tóraǵasy Batyrhan Meńdibaev da quttyqtady. ýyl turǵyndary atynan Úńirtas aýyldyq aqsaqaldar keńesiniń ókili Asanqul Toloqulov rızashylyǵyn jetkizdi.

Ashylý saltanatynan soń jınalǵan kópshilik mádenıet úıin aralap kórdi. Mádenıet úıinde ornalasqan kitaphanaǵa syı retinde Jambyl Jabaevtyń ómiri men shyǵarmashylyǵy týraly kitap syıǵa tartyldy.

Aýyl turǵyndaryna «Súıinbaı sazy» folklorlyq-etnografııalyq halyqtyq ansambl, aýdandyq mádenıet úıiniń shyǵarmashylyq ujymy daıyndaǵan konserttik baǵdarlama usynyldy.

Atap ótsek, Jambyl aýdany ákimdiginiń málimetinshe, mádenıet úıiniń ǵımaraty 1957 jyly salynǵan, 2019 jyly qaıta jańǵyrtý jumystary bastaldy. Qurylysty «О́mirzaq» JShS atqardy. Ǵımarattyń jalpy alańy 698,5 sharshy metr, 200 orynǵa arnalǵan kórermen zaly. Atqarylǵan jumystardyń quny -  251 574 000 teńge, jańarǵan mádenıet úıine barlyq qajetti qural-jabdyqtar alynyp, qyzmetin laıyqty atqarýǵa barlyq jaǵdaı jasalǵan.