"Járdemaqyny 100 paıyzǵa arttyrýdy talap etemiz". Múgedek jandar Toqaevqa úndeý joldady

Elde múgedek adamdarǵa tólenetin memlekettik járdemaqyny eki esege arttyrý máselesin kótergen petısııaǵa qol jınaý júrip jatyr. Egov.press saıtynda jarııalanǵan petısııada úkimet tarapynan múgedekterge tıisinshe kóńil bólinbeıtini aıtylady.

Petısııa avtory Ranıta Jumashevanyń sózinshe, Qazaqstanda múmkindigi shekteýli 700 myńdaı adam bar, olar jaldamaly turǵyn úı tólemine jumsalatyn bolmashy járdemaqyǵa ómir súredi.

"Biz, qazaqstandyq múgedekter, bul tólemderdi ádiletsiz dep sanaımyz, óıtkeni kópshiligimiz bir ýaqytta eńbek etip, qoǵamǵa paıda ákeldik. Biraq múgedek bolyp qalǵandyqtan, biz ysyrylyp qaldyq. Úkimet tarapynan nemquraılylyq anyq baıqalady. Osyǵan baılanysty biz qazirgi tólemderge úzildi-kesildi qarsymyz jáne múgedektik járdemaqysynyń mólsherin 100 paıyzǵa kóterýdi talap etemiz" delingen petısııa mátininde.

Avtor sondaı-aq qarapaıym azamattardy petısııaǵa beı-jaı qaramaı, oǵan qol qoıyp, múmkindiginshe áleýmettik jelide bólisýdi suraıdy. 

"Úkimet bizge tıisinshe kóńil bólmeıdi, eń bolmasa Qazaqstan azamattaryn belsendilik tanytyp, repost jasap kómektesýlerin suraımyz" degen Ranıta Jumasheva máseleni prezıdentke jetkizgisi keletinin aıtqan. Onyń oıynsha, mundaı túıitkildi sheshý prezıdenttiń ǵana qolynan keledi.

2021 jylǵy mamyrdaǵy derek boıynsha Qazaqstanda 702 158 adamnyń múgedektigi bar. Birinshi top múdekterine memleket tarapynan aı saıyn 65 860 teńge kóleminde járdemaqy tólenedi. Ekinshi toptaǵylarǵa 52 483 teńge, úshinshi toptaǵylarǵa 35675 teńge tólenedi.