Almatyda polısııa jumysynyń «servıstik modeli» tájirıbesi keń etek aldy

Almaty qalasynyń ákimi Baqytjan Saǵyntaevtyń tapsyrmasy boıynsha qala ákiminiń orynbasary Erjan Babaqumarov Prezıdenttiń "Halyq birligi jáne júıeli reformalar – eldiń órkendeýiniń berik negizi" atty Qazaqstan halqyna Joldaýynda belgilengen mindetterdi iske asyrý sheńberinde shahardyń qoǵamdyq qaýipsizdigin qamtamasyz etýde servıstik tásildi engizý máselesi boıynsha jumys keńesin ótkizdi.
 
«Halyqqa qoljetimdi polısııa» negizgi elementi bolýǵa tıis Ishki ister organdarynyń azamattarmen ózara qarym-qatynasynyń servıstik modeli quqyqtyq tártip salasyndaǵy problemalardy birlesip sheshýge baǵyttalǵan. Basty maqsat - kósheler men basqa da qoǵamdyq oryndarda qylmystyń aldyn alý.
 
Quqyq buzýshylyqtardyń aldyn alý boıynsha jumystyń tıimdiligin arttyrý maqsatynda buǵan deıin polısııanyń servıstik modeli pılottyq rejımde Alataý aýdanynyń «О́jet» yqshamaýdany men Bostandyq aýdanyndaǵy «Keremet» turǵyn úıinde iske qosyldy. Taldaý nátıjeleri negizinde atalǵan aýmaqta quqyq buzýshylyqtardyń jolyn kesý maqsatynda jumysty kúsheıtý boıynsha sharalar qabyldanyp, polısııanyń qosymsha modýldik beketi ornatyldy, tártip saqshylarynyń jaıaý narıadyn patrýldeý ulǵaıtyldy.
 
Sonymen qatar, Almatyda «Halyqqa qoljetimdi polısııa» qaǵıdaty aıasynda qalanyń ýchaskelik polısııa ınspektorlarynyń shtaty 113 birlikke ulǵaıtyldy. 9 qosymsha ýchaskelik polısııa pýnkti satyp alyndy. Odan bólek, 441 birlik beınetirkegish pen 432 planshet alyndy. Saıabaq aımaqtarynda, azamattardyń jappaı demalý oryndarynda patrýldik narıadtar úshin 55 birlik kólik quraldaryn satyp alýǵa qarajat bólindi.
 
Erjan Babaqumarov pılottyq jobany iske asyrýdyń aralyq nátıjelerine sáıkes servıstik polısııa tájirıbesin yqshamaýdan deńgeıinen Alataý aýdanyna deıin keńeıtý týraly sheshim qabyldanǵanyn habarlady. Búginde aýdandaǵy turǵyn sany 300 myńnan astam adamdy quraıdy.
 
Sóıtip, Alataý aýdanynyń bar aýmaǵy servıstik tásildi engizýdiń pılottyq aımaǵy bolyp belgilendi. Osyǵan baılanysty aýdan ákimi apparaty janyndaǵy qoǵamdyq qaýipsizdikti qamtamasyz etýde servıstik tásildi engizý, uıymdastyrýshylyq jáne ınstıtýsıonaldyq sıpattaǵy tıisti jumystardy júrgizý boıynsha aýmaqtyq vedomstvoaralyq top qurý jóninde tapsyrmalar berildi.
 
Atap aıtqanda, jobalaý keńsesi aýdan turǵyndarymen birlesip, turǵylyqty halyq arasynda taldaý men saýalnama júrgizedi, quqyq buzýshylyqtarǵa yqpal etetin sebepter men jaǵdaılardy skanerleıdi. Bul jumystyń nátıjesi pılottyq aýmaqty kartaǵa túsirý men ýchaskelik ınspektorlardyń jumysyn túzetý, patrýldeý júıesin keńeıtý, qosymsha beınebaqylaý kameralaryn ornatý, jaryqtandyrý syndy sheshimder qabyldaýmen sıpattalady.
 
Jalpy, polısııanyń servıstik modelin keńeıtý quqyq buzýshylyqtardyń aldyn alý jáne qoǵamdyq qaýipsizdikti nyǵaıtý salasyndaǵy jumystyń tıimdiligin arttyrýǵa múmkindik beredi.