Qala ákiminiń orynbasary turǵyndardyń ózekti máselelerin tyńdady

Shymkent qalasy ákiminiń orynbasary Erǵalı Bilisbekov onlaın rejımde kezekti ret azamattardy jeke máseleleri boıynsha qabyldady. Turǵyndardy baspana, áleýmettik máselelermen qatar, kóppáterli turǵyn úılerdiń jóndeý jumystary tolǵandyrady.

Máselen, osydan jıyrma jylǵa jýyq ýaqyt buryn jekeshelendirý quqyǵymen kezekte turǵan azamattarǵa paıdalanýǵa berilgen Á. Moldaǵulova kóshesi boıyndaǵy № 44 úı turǵyny shatyrdy jóndep berý ótinishin jetkizdi. Alaıda, búginde turǵyndardyń 70 paıyzy páterlerin óz attaryna jekeshelendirip alǵan. Oǵan sáıkes, óz menshik ıelerindegi jóndeý jumystaryn ózderi júrgizýleri qajet.

Qala ákiminiń orynbasary qysta halyq qınalmasy úshin jaýapty sala mamandaryna jaǵdaıdy tolyq zerdelep, qarajaty qaıtarymdy negizde modernızasııalaý jumysynyń jobasyn qarastyrýdy tapsyrdy. Turǵyndar biraýyzdan úı tóraıymyn saılaýlary qajet. Jalpy, qalalyq turǵyn úı basqarmasynyń málimetinshe, bıyl shaharda kommýnaldyq menshiktegi 11 kópqabatty turǵyn úıge aǵymdaǵy jóndeý jumystaryn júrgizý josparlanǵan.

Qabyldaý barysynda páter ıelerine «Múlik ıeleriniń birlestigi» nemese «Jáı seriktestik» qurý qajettigi túsindirildi. Úıdi basqarýdyń jańa formasy birqatar artyqshylyqqa ıe. Birinshi kezekte bul kóppáterli úılerdegi ortaq múlikti paıdalanýǵa bógde uıymdardyń emes, menshik ıeleriniń ózderi jaýap beretindigimen erekshe.

Qazirdiń ózinde Shymkent qalasynda 113 «Múlik ıeleriniń birlestigi» men 773 «Jáı seriktestik» qurylyp, tirkelgen. Turǵyndary kezek kúttirmeıtin shatyr,lıft nemese jertóleni jóndeý jumystaryna aı saıyn jınaıtyn qarajattaryn jumsaı alady.