Talǵat Temenov: Cataev Qasym han fılminiń ssenarııin áıeline jazdyrdy

Qazaqstannyń halyq artısi, rejısser Talǵat Temenov Aqan Sataevty "Qasym han fılmi ssenarııin oryssha oqyǵan áıeline jazdyryp, rýhanı qylmys jasady" dep aıyptady. Bul týraly ol Hit-TV arnasyndaǵy "Meniń ómirim" baǵdarlamasynda habarlady.

Temenovtiń aıtýynsha, "Qazaqfılm" basshylary aldymen, óz jaǵdaıyn, qala berdi qasyndaǵy jaqyndarynyń jaǵdaıyn oılaıtyn jaǵdaıǵa jetken.

– Aqan Sataev, Júrgenovti bitirgen jigit, ákesin de, sheshesin de bilemin. Biraq myna sońǵy áıeline ssenarııdi jazdyrypty. Qanshama ǵulamalarymyz otyr. Sonyń qasynda oryssha bitirip, qazaqtyń bir aýyz óleńin jatqa bilmeıtin, qazaqtyń bir jazýshysynyń kitabyn tól nusqada oqymaǵan adamnyń mundaı dúnıege barýy jáne oǵan birneshe mıllıon gonorar alýy jantúrshigerlik jańalyq boldy men úshin. Bul – durys emes. Bul ultty, eldi oılamaǵany. Qara basyn oılaǵan adam. Mundaı adamdar qazaqtyń basyna kún týsa, osynda qalyp, el qorǵaıdy, jer qorǵaıdy dep oılamaımyn, – deıdi Temenov.

Rejısserdiń sózinshe, "Tomırıs" tarıhı fılmi úshin ssenarıı jazǵandardyń qatarynda ózi de bolǵan. Alaıda Sataev onyń jumysyn qaramaǵan. Sondaı-aq Temenov fılm sıýjetinde úlken qatelik ketkenin aıtty.

– Úlken qateligi, Tomırıs Kırdiń basyn qanǵa malyp, ózi shabady. Negizi qasyndaǵy adamǵa jasatýy kerek edi. Bul – "Tomırısti" jazǵan Bolat Jandarbekov sııaqty ǵalymdardyń aldynda rýhanı qylmys, qatelik, – dedi Temenov.

Buǵan deıin "Qasym han" fılmin túsirýge túrik rejısseri shaqyrylǵan. Burynǵy mádenıet jáne sport mınıstri  Arystanbek Muhamedıuly túrik rejısser Metın Gıýnaıdy elbasymen jolyqtyryp "Qasym han" fılmin túsirýge  ruqsat alǵan. Kóp uzamaı jobaǵa bıýdjetten 11 mlrd teńge bólingen.

Alaıda jazýshy Smaǵul Elýbaı tarıhı tulǵanyń ómiri týraly kınony túrik rejısseriniń ssenarıimen túsirýge qarsy bolyp, qazirgi mádenıet jáne sport mınıstri Aqtoty Raıymqulovaǵa hat joldap, sarapshylar keńesiniń talqysyna qaıta salýdy suraǵan. Jazýshynyń ótinishine qulaq asqan mınıstr fılm túsirý belgisiz merzimge shegeriletinin málimdegen.

Sh. Aımanov atyndaǵy "Qazaqfılm" kınostýdııasynyń baspasóz qyzmeti tarıhı týyndynyń ssenarıin Aqan Sataev, Tımýr Jaqsylyqov jáne Názıra Baqaeva (Aqan Sataevtyń buryńǵy áıeli - red) jazyp jatqanyn habarlady. Kınonyń daıyndyq jumysyna 2020 jyly 511 mln teńge bólingen.

Kınokartına aınalasyndaǵy daý munymen bitpeıdi. Almaty qalalyq ekonomıkalyq tergeý departamenti "Qasym han" tarıhı hıkaıasyn túsirý kezinde 30 mıllıonǵa jýyq qarajat urlanǵanyn anyqtaǵan. Sot úkimine saı, aıyptalýshylar qylmystyq kodekstiń 189-baby, 3-bóligi, 1, 2-tarmaqtary (óziniń qyzmet babyn paıdalanýy-red) boıynsha kináli dep tanyldy. "Qazaqfılm" AQ "Qasym han" kınojobasy" fılıalynyń burynǵy dırektory 2 jylǵa, onyń eki sybaılasyn 3 jylǵa deıin bas bostandyǵynan aıyrylǵan.