Ál-Jazıra Qytaı áýe armııasynyń nege daıyndalyp jatqanyn habarlady

Qytaıdyń áskerı kúshteri osy aptada eldegi eń iri áýe shoý ótkizip, eń ozyq qarý-jaraqtaryn kórsetpek. Bul týraly Ál-Jazıra telearnasy habarlady.

"Airshow China" áskerı shoýy pandemııa saldarynan bir jylǵa keshiktirilgen. Endi ol seısenbide Qytaıdyń Chjýhaı qalasynda ashylady.

Qytaıdyń memlekettik "Global Times" gazeti áýe kúshteriniń eń ozyq ıstrebıteli "J-20" qatysatyn "tańǵajaıyp ushýlar" bolatynyn habarlady.

"J-16D" elektrondy soǵys ushaqtaryn, "WZ-7" joǵary bıiktikke ushatyn drondy jáne "WZ-8" joǵary jyldamdyqtaǵy drondy qosa alǵanda, basqa da jetildirilgen ushaqtar birinshi ret ashyq kórme alańynda kórsetiletini aıtyldy.

Bul áskerı shoý Tynyq muhıty aımaǵyndaǵy strategııalyq básekelestik kúsheıip jatqan kezde ótkizilmek.

Jaqynda Amerıka Qurama Shtattary, Ulybrıtanııa jáne Avstralııa  úsh jaqty "Aukus" qaýipsizdik kelisimin jarııalady. Kelisim boıynsha, Avstralııaǵa atomdyq súńgýir kemeleri beriledi. Bul kelisim Avstralııany álem boıynsha atomdyq súńgýir kemeleri bar jetinshi elge aınaldyrady.

"Aukus" kelisimine sáıkes, odaqtastar kıber múmkindikterin, jasandy ıntellekt jáne basqa da teńiz asty tehnologııalaryn ózara bólisedi. Kelisimge qol qoıylǵannan keıin Qytaıdyń memlekettik gazeti Avstralııa Beıjińniń ıadrolyq soqqysynyń nysanasyna aınalýy múmkin ekenin málimdegen.

Al ótken jumada AQSh, Avstralııa, Japonııa jáne Úndistandy qamtyǵan tórttik elderi basshylary Aq úıde jeke kezdesti.

Tórttiktiń kezdesýi daýly Ońtústik Qytaı teńizi men Taıvanǵa qatysty kúsheıe túsken Qytaıdyń yqpalyna qarsy áreket retinde qarastyryldy.