10 Qyrkúıek, 2021 Barlyq aımaqtar
Foto: Aljazeera
"Talıban" sodyrlary Aýǵanstan astanasy Kabýldaǵy narazylyq aksııalaryn habarlaǵany úshin jýrnalısterdi uryp-soǵyp, qamaýǵa aldy. Bul týraly Aljazeera aqpart agenttigi málimdedi.
"Etilaat Roz" gazetiniń jýrnalısteri Takı Darıabı men Nematýlla Naqdı sársenbi kúni tańerteń Kabýldyń batysynda áıelder narazylyǵyn jarııalaý kezinde tálipterge ustalǵan.
Qamaýǵa alynǵan jýrnalısterdiń áriptesteri Aber Shaıgan men Lýtfalı Sýltanı áriptesteriniń qaıda ekenin suraý úshin gazet redaktory Kadhım Karımımen birge polısııa bólimine barǵan. Olar polısııa bólimshesine jetken sátte "Talıban" sodyrlary áriptesterin ıterip, uryp-soǵyp, barlyq zattaryn, sonyń ishinde uıaly telefondaryn tartyp alǵanyn bilgen.
Aýǵanstanda habar taratatyn "Etilaat Roz" kompanııasynyń negizin qalaýshy jáne bas redaktory Zakı Darıabı jaraqat alǵan eki áriptesiniń sýretterin jarııalady.
Ol bólisken sýrette jýrnalısterdiń arqa, aıaq, ıyq jáne qoldarynda jaraqat izderi baıqalady.
Zakı Darıabı bul oqıǵany búkil Aýǵanstandaǵy táýelsiz BAQ quraldaryna arnalǵan eskertý ekenin atap ótti.
– Tálipter bizdiń áriptesterimizdi 4 saǵattan astam ýaqyt tergeý ızolıatorynda ustady. Osy 4 saǵat ishinde olardy aıaýsyz uryp-soǵyp, azaptady, – dedi ol.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir