Almatylyq mektepter men joǵary oqý oryndarynda Táýelsizdiktiń 30 jyldyǵyna oraı ashyq sabaqtar ótkizildi

Almaty qalasynyń mektepteri men joǵary oqý oryndarynda el táýelsizdiginiń 30 jyldyǵyna oraı ashyq sabaqtar bastaldy. Aı boıy respýblıkanyń barlyq mektepterinde osy taqyrypta synyp saǵattary men ashyq sabaqtar ótkiziledi. Urpaq sanasyna qasterli táýelsizdik jyldarynyń qasıetin uǵyndyratyn joba búgin Almaty qalasyndaǵy mektepter men JOO-da da  bastaý aldy.

Bostandyq aýdanyna qarasty M.Maqataev atyndaǵy №140-mektep-gımnazııasynda 5-synyp oqýshylary arasynda Qazaqstan Respýblıkasy Táýelsizdiginiń 30 jyldyǵyna oraı «Táýelsizdik jetistikteri» atty synyptyq tárbıe saǵaty ótti.

Ashyq tárbıe saǵatynyń maqsaty – bilim men tárbıe berý, oqýshylarǵa 30 jylda elimiz  jetken 30 jetistikti nasıhattaý.

Synyp saǵaty memlekettik ánuranmen bastaldy. Dáris barysynda táýelsizdik jyldaryndaǵy memlekettik qurylystyń negizgi qorytyndylary men perspektıvalary, sondaı-aq Qazaqstan Respýblıkasynyń tuńǵysh prezıdenti - elbasy N.Á.Nazarbaevtyń táýelsiz memleketti nyǵaıtýdaǵy tarıhı róli týraly aıtyldy. 

Bostandyq aýdandyq  Bilim bóliminiń basshysy Baqytbek Bostandyqulynyń aıtýynsha, el Táýelsizdiginiń 30 jyldyǵyna baılanysty mundaı is-sharalar qaladaǵy ár mektep pen balabaqshada oqý jylynyń aıaǵyna deıin uıymdastyrylady. Bostandyq aýdany boıynsha oqýshylar arasynda túrli ashyq sabaqtar, sýret kórmeleri, sporttyq oıyndar, baıqaýlar ótkiziledi. Aýdanda 34 memlekettik, 24 jeke menshik mektep bar. Memlekettik mektepterde 37 myńdaı oqýshy oqıdy.  Bastaýysh, orta jáne joǵarǵy býyn arasynda is-sharalar  aldymen  mekteptiń ózinde, keıin aýdan boıynsha ótedi. 

«Jyldyń sońyna deıin ótetin is-sharanyń M.Maqataev atyndaǵy mektep-gımnazııasynda bastalýynyń ózi teginnen tegin emes. Bıyl aqıyq aqyn M.Maqataevtyń týǵanyna 90 jyl tolyp otyr, ári bul mektep –  qaladaǵy eń úzdik mektepterdiń biri. Soǵan baılanysty taǵylymdy sharalardy biz  osy mektepten bastaǵandy jón kórdik», – dedi Baqytbek Bostandyquly.

Joǵary oqý oryndary stýdentteriniń arasynda da Táýelsizdik uǵymy nasıhattalyp, onyń tarıhı alǵysharttary men saıası kórinisi túsindirildi. Mysaly, S.J.Asfendııarov atyndaǵy Qazaq ulttyq medısına ýnıversıtetiniń qabyrǵasynda «Táýelsizdik jyldaryndaǵy egemendi elimizdiń jáne S.J.Asfendııarov atyndaǵy QazUMÝ-dyń tuǵyrly jetistikteri» atty merekelik shara ótkizildi. 

Ekinshi kýrs stýdentteri arasynda uıymdastyrylǵan shara ádettegideı Ánuranmen bastalyp, atalmysh  oqý ornynyń Korporatıvtik damý jónindegi prorektory, professor Ýbaıdýlla Mahambetulynyń alǵy sózimen jalǵasty.

«Bul sharany  Táýelsizdigimizdiń 30 jyldyq mereıtoıy qarsańynda  uıymdastyryp otyrmyz. Otyz jyl tarıh keńistiginde az ba, kóp pe degen suraq týyndaıdy. Meniń oıymsha, másele ýaqyttyń uzaqtyǵynda emes, osy jyl ishinde atqarylǵan jumystardyń nátıjeliliginde. Otyz jylda elimizde eleýli tarıhı ózgerister oryn aldy. Saıası arenada bolsyn, ekonomıkalyq turǵydan bolsyn Qazaqstan óz atyn shyǵaryp, ómirlik mańyzy bar barlyq salalarda damydy. Sonyń ishinde bilim salasynda talaı reformalar júrgizilip, joǵary oqý oryndarynda bilim berýdiń jańa júıeleri engizildi. Oǵan bizdiń ýnıversıtettegi ózgerister dálel. Qazir biz elimizdegi medısınalyq ýnıversıtetter arasynda QS reıtıngine engen jalǵyz oqý ornymyz. Atap aıtsaq, Bolon prosesi, akademııalyq utqyrlyq, sheteldik tájirbıe, taǵysyn taǵy. Joǵarydaǵy atqarylǵan jumystardyń júgi aýyr dep oılaımyn, sondyqtan 30 jylda el retinde jetken jetistigimiz jeterlik dep dóp basyp aıta alamyz», - dedi prorektor. 

Kelesi kezekte arnaıy shaqyrylǵan qonaq – astanalyq Medısına ýnıversıtetiniń professory, tarıh ǵylymynyń doktory Janna Sábıtqyzy sonaý saq-sarmattardan bastap, 1986 jyly jalyndaǵan qazaq jastarynyń kóterilisine deıingi tarıhı oqıǵalardy jipke tizip aıtyp berdi. Sol arqyly egemendikke ákelgen joldyń tar jol, taıǵaq keshý ekenin túsindirgendeı áser qaldyrdy. 

Odan bólek, saıasattanýshy Talǵat Janysbaı, qazaqstan tarıhy jáne áleýmettik-gýmanıtarlyq pánder kafedrasynyń assıstenti Ǵalym Alaýdıuly syndy qonaqtar da óz oılarymen bólisip, stýdenttermen pikirtalas órbitti. 

Ýnıversıtet prorektory Ýbaıdýlla Mahambetuly mundaı sharalar jyl boıy jalǵasyn tabatynyn, bul tek bastama ekenin jetkizdi. Jalpy jyl boıy Táýelsizdiktiń 30 jyldyǵy respýblıka boıynsha barlyq mektepter men joǵary oqý oryndarynda keńinen atalyp ótpek.