О́zge el atynan óner kórsetip júrgen sportshy qazaqtar

Kúni keshe Tokıo olımpıadasynda Ýálıhan Serik esimdi etnıkalyq qazaq 60 kelide grek-rım kúresinen Qytaı qorjynyna qola medal saldy.

Qyzyǵy, bul salmaqta úsh birdeı qazaq boz kilemge shyqty. Alaıda olardyń árqaısysy ártúrli tý astynda óner kórsetti. Meırambek Aınaqulov Qazaqstan sportshysy bolsa, Ýálıhan Serik – Qytaı azamaty, Ermurat Tasmuratov – О́zbekstan ókili.

Júldeli oryn ıelengen Ýálıhan Serik 1992 jyly Shyńjań ólkesi Tarbaǵataı aımaǵynyń Dúrbejin aýylynda dúnıege kelgen. 2018 jyly Býdapeshte ótken álem chempıonatynda qola medal alǵan.

Elmurat Tasmuratov bolsa, 1991 jyly О́zbekstannyń Tashkent oblysy Bostandyq aýdanynda dúnıege kelgen. 

2004 jyly tarıhı otany – Qazaqstanǵa oralyp, Túrkistandaǵy Bekzat Sattarhanov atyndaǵy mektep-ınternatta 4 jyl oqıdy. Ol 2016 jyly Azattyq radıosyna bergen suhbatynda Qazaqstanda júrgende biraz jarystarda jeńgenin, biraq ózin shettetip,  jattyǵý jıyndaryna shaqyrmaǵanyn aıtqan. Sosyn amalsyz О́zbekstanǵa oralǵan. 

Ol О́zbekstan sapynda álem chempıonatynyń kúmis júldegeri atanyp, eki márte qolaǵa qol jetkizgen. 2016 jylǵy Rıo olımpıadasynda úzdik úshtikke ilinedi.

Aıtýynsha, oǵan О́zbekstanda barlyq jaǵdaı jasalǵan.

Buǵan deıin boksshy Qanat Islam, grek-rım kúresinen Álnur Tórgeuly Qytaı atynan 2004 jylǵy Afıny olımpıadasyna qatysqan.

Qanat Islam 2008 jylǵy  Beıjiń olımpıadasyna da qatysyp, qola medal alǵan.

Álnur Tórgeuly bapkerlikke bet burǵan. Qazir grek-rım kúresi boıynsha Qytaı ulttyq quramasynyń aǵa jattyqtyrýshysy.

2016 jylǵy Rıo olımpıadasynda Erlanbek Káteıuly esimdi taǵy bir qazaq Qytaı atynan óner kórsetti. Ol 1990 jyly Qytaıdyń Altaı aımaǵynda dúnıege kelgen. Erlanbek Káteıuly Qytaıdaǵy qazaqtar arasynan olımpıadaǵa joldama alǵan úshinshi qazaq.

Rıo olımpıadasynda ózge el atynan jarysqa shyqqan qazaqtardyń biri – Talǵat Ilııasov.

Ol jarysqa erkin kúresten Avstralııa ókili bolyp qatysqan. Talǵat О́zbekstanda týǵan etnıkalyq qazaq. Qaryndastary qazirgi tańda Qazaqstanda turyp jatyr.