15 Shilde, 2021 Saıasat
Foto: Qamshy.kz
Demokratııalyq partııa bastamashyl tobynyń jetekshisi, belsendi Janbolat Mamaı bılik tarapynan ózderine qarsy ashyq shabýyl bastalǵanyn málim etti.
Janbolat Mamaı belsendilerdi qamaý, abaqtyda azaptaý, ákimshilik, qylmystyq is qozǵaý sekildi áreketterdiń saıası astary bar degen pikirde. Ol bılik mundaı áreketteri arqyly ózderin syndyra almaıtynyn, kúres jolyn toqtatpaıtyndaryn habarlady.
Belsendi keshe 6 táýlikke qamalǵan eki jaqtasynyń biri Abzal Dostııarovty Almaty polısııa departamentinde azaptaǵanyn aıtty. Dostııarov advokatyna polısııa qyzmetkerleri ózin uryp-soqqanyn, kamera aldynda Janbolat Mamaıǵa qarsy kýálik etýge májbúrlemek bolǵanyn, ol úzildi-kesildi qarsylyq tanytqanyn jetkizgen. Belsendi polıseıler áreketine qarsylyq retinde ashtyq jarııalaǵan. Dostııarovtyń jaqtastary onyń densaýlyǵy men ómiri úshin alańdaıtynyn, oǵan medısınalyq kómek kórsetilýin qamtamasyz etip, din-aman ekenine kóz jetkizý úshin erteń 16 shilde saǵat 14:00-de Almaty polısııa departamentine jınalatynyn málim etti.
Sondaı-aq búgin Shymkent qalalyq Mádenıet úıiniń basshysy, ánshi, Mýzart tobynyń múshesi Sáken Maıǵazıevtiń "Dempartııa" belsendisi Arýjan Dúı̆sebaevanyń ústinen qylmystyq kodekstiń "Qorlaý" babyna saı túsirgen aryzy boıynsha sot otyrysy ótti. 25 naýryzda "Demokratııaly Qazaqstan" youtube arnasynda Arýjan Dúısebaevanyń Shymkent ákimdigi Naýryz meıramyn atap ótýge jarty mıllıardqa jýyq qarjy bólgeni týraly vıdeosy shyqqan. Belsendi vıdeoda Naýryz merekesin atap ótýge bólingen 595 mln teńge qarjynyń oryndy jumsalǵanyna kúmán keltirip, qarajatty jaratý boıynsha kelisim-sharttarǵa qol qoıǵan Sáken Maıǵazıevti "qurmetsiz", "jemqor" dep ataıdy. Vıdeo sońynda Maıǵazıevten 595 mln teńgeniń jumsalýy boıynsha esep berýdi suraıdy. Sáken Maıǵazıev qarjynyń jumsalýy boıynsha esep bermedi. Arada birneshe aı ótkende "ar-ojdanymdy qorlady" dep belsendini sotqa berdi. Belsendiler Maıǵazıevtiń 4 aıǵa jýyq ýaqyttan keıin sotqa shaǵymdanýynyń artynda bılik tapsyrmasy tur degen pikirde.
Arýjan Dúı̆sebaeva búgingi sot otyrysy tatýlasý, kelisimge kelý boıynsha ótkenin, Sáken Maıǵazıev ózinen áleýmettik jeli arqyly keshirim surap, vıdeony óshirýge shaqyrǵanyn, aryzdanýshy tarappen tatýlaspaıtynyn, sońyna deıin baratynynyn málim etti. Aıtýynsha, Maıǵazıevtyń qorǵaýshylary sýdıadan proseske jýrnalısterdi qatystyrmaýdy suraǵan. Sondaı-aq ol sýdıa "sheshimniń qandaı bolatynyn ishteı bilip turmyn, ony keıin aıtamyn" dep aıtqanyn jetkizgen.
Buǵan deıin "Dempartııa" belsendileriniń 6 shilde kúngi Almatyda ótken mıtınginde Yrysbek Toqtasyn, Dáýren Dostııarov, Ýálıhan Sultanov esimdi úsh belsendisi ustalǵan bolatyn. Búginde Ýálıhan Sultanov bostandyqta bolsa, qalǵan eki belsendi ýaqytsha ustaý ızolıatorynda otyr.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir