Vaksına saldyrǵandar 2 jyldan keıin qaıtys bolatyny ras pa? Maman jaýap berdi

"Koronavırýsqa qarsy vaksına saldyrǵandar eki jyldan keıin qaıtys bolady" degen qaýesetke Qoǵamdyq densaýlyq saqtaý ulttyq ortalyǵynyń dırektorynyń orynbasary Manar Smaǵul jaýap berdi.

Manar Smaǵul halyqty el arasyndaǵy qaýesetterge senbeýge shaqyryp, ár adam resmı aqparatty qoldanyp sheshim qabyldaý kerektin aıtty.

– Qazir adamdarǵa jalǵan aqparat berilip jatyr. Vaksınany densaýlyq saqtaý salasynda birneshe jyldan beri qoldanyp kelemiz. О́zderińiz bileıtindeı jańadan týǵan balalarǵa, qyzylsha, qyzamyq pnevmokokk (dene qyzýynyń artýy, álsizdik, dene aýrýy, muryn-aýyz qýysyndaǵy jaǵymsyz sezinýler, bas aýrýy – red.) juqpasyna qarsy vaksına salynyp júr. Olardyń tıimdiligi búginde dáleldengen.

Al koronavırýsqa qarsy vaksınaǵa toqtalsaq, byltyr jeltoqsannan ózge elderde ekpeni qoldaný bastaldy. Eki jyldan keıin ólim-jitim bolady degen "jalǵan" aqparat, – dep jaýap berdi ol.

Densaýlyq saqtaý mınıstrliginiń málimetine sensek, 14 shildede Qazaqstanda koronavırýs ınfeksııasyna qarsy vaksınanyń birinshi komponentin 4 705 675 adam, ekinshi komponentin 2 597 505 adam saldyrǵan.