Qyzylorda oblysynda tótenshe jaǵdaı jarııalandy

Qyzylorda oblysy Aral aýdanynda el tarıhynda alǵash ret qýańshylyqqa baılanysty  tótenshe jaǵdaı jarııalandy. Bul týraly Astana arnasy habarlady.

Telearnanyń habarlaýynsha, bıyl óńirde jaýyn jaýmaı, ózen-kólderde sý azaıyp, jaıylymǵa shóp shyqpaı 600-ge jýyq iri qara aram ólgen.  Mamandardyń esebinshe, aýdanǵa 205 myń tonna mal azyǵy kerek. Ol jaqyn oblystardan jáne aýdandardan jetkiziledi. Jergilikti bılik janar-jaǵarmaı shyǵynyn kóteredi.

Sonymen qatar, uńǵymalar qaıta qalpyna keltirilip, sý arnalary tazartylady. Bul maqsatqa memleketten 1 mıllıard teńgeden astam qarjy bólingen.

– Aýdan boıynsha qajetti shóptiń kóleminiń 84640 tonnasy qazir jetkizilip, aýdan óz múmkinshilikterin qarastyryp, qazir 3645 tonnasyn qamtamasyz etemiz degen josparymyz bar. Aldaǵy ýaqytta 146 myń tonna shópti syrttan tasymaldaý qajet. Qajetti qarjynyń barlyǵy 1 mlrd 936 mln-dy qurap tur, – dedi Aral aýdanynyń ákimi Serik Sermaǵanbetov.