"Bizdi nege urady". Kúıeýi tapanshamen betinen atqan Shakıla Zarın aýǵan áıelderiniń quǵyǵyn kóterdi

25 jastaǵy Shakıla Zarın sózi men beti arqyly aýǵan áıelderi quqyǵynyń ókili bolǵysy keletinin aıtady. Ol erte turmysqa shyǵyp, kúıeýinen qorlyq kórgen. Aqyrynda kúıeýi tapanshamen betinen atyp, 22 otadan keıin zorǵa aman qalǵan. Alǵan jaraqatynyń saldarynan búginde sol jaq beti qısaıyp ketken.

Shakıla Zarın Aýǵanstannyń soltústigindegi Baglan provınsııasynda týǵan. Ol ótken ómirin qatty qınalyspen eske alady. Balalyq shaǵy aýyr bolǵan. Bala sekildi oınap kúlgen kezi esinde joq. Kishkentaıynan aǵalary, jezdesi únemi taıaqtasa, turmysqa shyqqan soń kúıeýi udaıy qol kótergen.

17 jasynda kúshtep ózinen jasy úlken er adamǵa turmysqa shyǵarylǵan. Kelin bolyp túse salysymen kúıeýi uratynyn meńzep "sen osyǵan laıyqsyń" dep qoldan jasalǵan qamshyny kórsetken. Shakıla Zarınniń "bizdiń qandaı kinamiz bar, bizdi nege urady" degenine kúıeýi "áıelder qalaı ǵana bizge qarsy shyǵyp, sóıleıtin bolǵan" dep ashýlanǵan.

Birde Shakıla Zarınniń polısııa ýchaskesine barǵanyn bilip qoıǵan kúıeýi ony betinen tapanshamen atqan. Shakıla Zarın 22 ota jasatyp, aılap aýrýhanada jatady. Ol bul sumdyqtyń bári tús eken dep oılap, tezirek bitýin tileıdi. Biraq aýrýhana tóseginde oıanǵanda anasynyń jylap otyrǵanyn kórip, munyń bári tús emestigin túsingen. "Bul meniń ómirimniń bir bóligi" edi deıdi ol.

Basynan ótken jaǵdaıǵa qaramastan Shakıla Zarın ózin joly bolǵan adam dep sanaıdy. Ol Aýǵanstandaǵy áıelder óte qıyn jaǵdaıda ómir súrip otyrǵanyn, óziniń sózderi men alǵan jaraqatynan keıin qısaıǵan beti arqyly aýǵan áıelderiniń quqyǵyna ókildik etip, olardy qorǵaǵysy keletinin jetkizedi.

Shakıla Zarın qazir Kanadada turyp jatyr.

Aýǵanstan áıelden quqyǵy saqtalmaıtyn elder qataryna jatady. Byltyr áıelderge qarsy zorlyq-zombylyqtyń 3500 resmı deregi rastalǵan. Belgili emesi qanshama... Eldegi qaýipsizdik jaǵdaıy nasharlaǵan saıyn mundaı derekter artýy yqtımal degen qaýip basym.

Derekkóz: BBC