Prezıdent Qasym-Jomart Toqaev Dúnıejúzilik densaýlyq saqtaý uıymynyń Bas dırektory Tedros Adhanom Gebreıesýspen vıdeo konferensııa rejıminde kezdesý ótkizdi, dep habarlady Aqorda saıty.
Kezdesý barysynda Qazaqstan men Dúnıejúzilik densaýlyq saqtaý uıymy arasyndaǵy, atap aıtqanda, koronavırýs pandemııasyna qarsy is-qımyl boıynsha yntymaqtastyqty nyǵaıtýdyń perspektıvalary qarastyrylǵan.
Aqorda saıtynyń málimetinshe, áńgimelesý barysynda COVID-19 indetine qarsy ekpe egý úderisine basa mán berilgen. Prezıdent Dúnıejúzilik densaýlyq saqtaý uıymynyń basshysyna qazaqstandyq QazVac vaksınasynyń klınıkalyq synamalarynyń aldyn ala nátıjeleri týraly aıtqan.
"Otandyq vaksınanyń tıimdilik deńgeıi 96 paıyz. Qazirgi ýaqytta salalyq organdar otandyq vaksınaǵa kelisim alý úshin Dúnıejúzilik densaýlyq saqtaý uıymymen jumys júrgizip jatyr. Tedros Adhanom Gebreıesýs Qasym-Jomart Toqaevtyń pandemııaǵa qarsy kúrestegi eńbegine joǵary baǵa berdi.
Sonymen qatar ol QazVac ekpesiniń ázirlemesin qoldaıtynyn jáne Dúnıejúzilik densaýlyq saqtaý uıymy tótenshe jaǵdaı kezinde paıdalanýǵa bolatyn dári-dármekterdiń tizimine qosý múmkindigin qarastyrýǵa daıyn ekenin aıtty" delingen aqparattyq habarlamada.
Taraptar sondaı-aq alǵashqy medısınalyq-sanıtarlyq kómek qyzmetiniń damý perspektıvalaryn, atap aıtqanda, 2018 jyly qabyldanǵan Astana deklarasııasyn ilgeriletý máselesin qozǵaǵan.
"Osy oraıda Memleket basshysy Qazaqstannyń bastamasy boıynsha ázirlenetin Alǵashqy medısınalyq-sanıtarlyq kómek týraly saıası rezolıýsııany qoldaýǵa shaqyrdy. Atalǵan qujat 2022 jyly ótetin BUU Bas Assambleıasynyń kezekti sessııasynda qabyldanýy múmkin. Rezolıýsııa jobasynda Astana deklarasııasynyń mindetteri men Alǵashqy medısınalyq-sanıtarlyq kómek mehanızmderi qamtylǵan" dep jazdy Aqorda saıty.
Pikir qaldyrý
pikir