Vashıngton túrmede otyrǵan reseılik oppozısoner Alekseı Navalnyı abaqtyda qaıtys bolsa, Máskeý úshin onyń saldary aýyr bolatynyn eskertti.
Ulybrıtanııa, Fransııa, Germanııa jáne Eýropalyq Odaq ta onyń emdelý jaǵdaıyna alańdaýshylyq bildirdi.
Navalnyıdyń dárigerleri onyń arqa aýrýy men aıaǵynyń uııýyna shuǵyl medısınalyq kómek kórsetilmese, "jaqyn kúnderi ol óledi" deıdi.
Reseıdiń Ulybrıtanııadaǵy elshisi Navalnyıǵa nazaryn aýdaryp otyrǵanyn jáne "túrmede ólýine jol berilmeıdi" dep málimdedi.
Ol 31 naýryzda óziniń medısınalyq tobyna kezige almaýyna narazylyq retinde ashtyq jarııalady. Onyń dárigerleri jaqyndaǵy qan analıziniń nátıjelerinen keıin Navalnyıdyń búırek qyzmeti nasharlap, kez kelgen ýaqytta júregi toqtaýy múmkin ekenin aıtqan.
Alekseı Navalnyı reseılik oppozısıoner, jemqorlyqqa qarsy kúres qorynyń negizin qalaýshy. 2018 jyly ótken prezıdent saılaýyna qatyspaq bolǵanynda kandıdatýrasy alynyp tastalǵan. 2020 jylǵy tamyzda ony áldekimder ýlap, ólim aýzynan qalǵan. Alekseı Navalnyı buǵan Reseı prezıdenti Vladımır Pýtındi aıyptady. Densaýlyǵy ońalǵan soń Navalnyı ózin ýlaǵandardy anyqtaý maqsatynda zertteý júrgizip, onyń nátıjesinde ózin Pýtın ýlaǵanyn aıtady. Uzamaı Navalnyı em alǵan Germanııadan otany – Reseıge oralyp, Máskeýge qonǵan boıda ustalady. Sot ony merziminen buryn bostandyqqa shyǵý shartyn buzdy degen aıyppen sottady. Alekseı Navalnyı buny "óziniń únin óshirý úshin ádeıi jasalǵan bılik áreketi" dep sanaıdy. Sondaı-aq Navalnyı qamalǵannan keıin onyń komandasy "Pýtınniń záýlim saraıy" týraly derekti fılm shyǵardy. Fılm youtube jelisinde 100 mln-nan astam qaralym jınap, álemniń kóptegen elinde kórildi. Kreml "fılmde aıtylǵan derekter shyndyqqa janaspaıdy" dep málimdedi. Artynsha, Reseıdiń 10-daǵan qalasynda Navalnyıdy bosatýdy talap etken mıtıngter ótti. Narazylyq aksııalary kezinde belsendiler jappaı qamaldy.
Pikir qaldyrý
pikir