"Polısııa aryzymyzdy qabyldamady". Aıajan Edilova isiniń jaı-japsary habarlandy

NeMolchıKZ qoǵamdyq qory Almatyda 19 jastaǵy Aıajan Edilovany aıaýsyz óltirdi delingen kúdiktini ómir boıyna bas bostandyǵynan aıyrýdy suraıdy. 

NeMolchıKZ qoryna óltirilgen qyzdyń jaqyndary habarlasyp, istiń mán-jaıyn ashyp aıtqan.

Boıjetken Almatydaǵy "Symbat" dınaın jáne sán akademııasynyń 4-kýrsynda oqyǵan. О́ziniń avtorlyq kolleksııasy men ınternet dúkeni bolǵan. Sondaı-aq sán salonynda jumys istegen.

19 naýryz kúni keshke Aıajan 20.48-de jumystan shyqqan. Jataqhana mańyndar ony er adam tosyp turǵan. 23.00-de Aıajannyń telefonynan "shyǵyp jatyrmyn" degen hat jiberilgen. Sol túni Aıajan jataqhanaǵa oralmaǵan.

Aıajannan habar bolmaǵan soń basynda sóılesip júrgen jigiti men qurbylary dabyl qaǵyp, ertesine týystaryn taýyp, izdeýge kóshken. Aıajannyń jaqyndary onyń belgisiz er adammen kezdesýin ınternet dúken jumysymen baılanystyrady. Er adammen qarym-qatynas qurý úshin kezdesken bolýy múmkin degen nusqany teristeıdi. О́ıtkeni Aıajannyń jigiti bolǵanyn aıtady.

20 naýryzda ertemen izdeý bastalyp, túski 12 shamasynda jaqyndary qyzdyń joǵalǵany týraly aryz jazý úshin polısııaǵa barady. Alaıda ol jaqtaǵylar mıtıngke baılanysty kúsheıtý júrip jatqanqanyn jetkizip, aryzdy qabyldaýdan bas tartqan. Kezekshi bólimdegilerdiń biri "ol qurbylarymen nemese jigittermen qydyryp, bir jerde uıyqtap jatyr. Oıanǵan soń habarlasady. Biz mundaıdy kúnde kórip júrmiz" degen.

Polısııadan shyqqan jaqyndary izdeýdi óz betinshe jalǵastyrǵan. Izdeýge dostary men eriktiler qosylyp, taksı qyzmetterine habarlasa bastaǵan. Aıajannyń aǵasy 20 naýryzda 15.00-de 102 nomerine habarlasyp, qyzdyń joǵalǵany týraly habarlaǵan.

21 naýryzda eriktiler ındraıver júrgizýshisin taýyp, ol Aıajandy aparǵan jerdiń mekenjaıyn aıtady. Taksıdi Rýslan degen bireýdiń shaqyrǵanyn aıtqan. Eriktiler mekenjaıdy polısııaǵa habarlap, abonettik nomer beketiniń bazasy arqyly izdeýge kóshken.

Jaqyndary túngi 11-lerde taksı kórsetken mekenjaıǵa kelgende ol jerde polıseıler kóptep júrgen, páterge kirgizbegen. Sálden soń jedel járdem kóligi kelip, páterden ústine qan juqqan er adamdy alyp shyqqan.

Artynsha arnaıy ýákil shyǵyp qyz páterden tabylmaǵanyn aıtyp, erteńgisin polısııaǵa kelýlerin suraǵan.

22 naýryz saǵat 12:00-de jaqyndary polısııada bolǵanda, aǵasy jańalyqtardan Aıajannyń óli tabylǵanyn oqyp, polıseılerden túsinik berýdi suraǵan. Polısııadaǵylar Aıajan denesiniń bólikteri 21 naýryzda páterden tabylǵanyn, biraq ony týystaryna qalaı aıtaryn bilmegenin jetkizgen.

NeMolchıKZ qoryna kúdikti ákki qylmysker ekenin, jas qyzdyń denesin ábden jiliktegenin habarlady. Aıajannyń aǵasy kúdiktiniń medısınalyq bilimi bolǵanyn, zııaly otbasydan shyqqanyn, kórshileri tárbıeli bala retinde sıpattaǵanyn aıtqan.

Polısııa taratqan aqparattyq habarlamadan 1993 jyly týǵan N. esimdi kúdikti qyzdy Alataý aýdany Nurkent yqshamaýdanyndaǵy turǵynúılerdiń birine aparǵany, páter esigin buzyp kirgen kezde kúdikti ózine qol jumsaýǵa árekettengeni, qylmysyn 19 naýryzdan 20-syna qaraǵan túni jasaǵany belgili boldy. Kúdikti qylmysynyń izin jasyrý úshin deneni jiliktep, keı bóligin aýdannan alys jerge qoqys jáshigine tastaǵan.

Qazirgi ýaqytta ustalǵan 1993 jylǵy Túrkistan oblysynyń týmasy tergelip jatyr.

NeMolchıKZ qory kúdikti psıhıkalyq naýqas retinde jazadan qashyp qutyla ma dep alańdap, mundaı qatygez qylmys úshin kúdiktini ómir boıyna bas bostandyǵynan aıyrýdy talap etýde.