N.Nyǵmatýlın: aksızder mólsherlemelerin anyqtaý kezinde naryqtaǵy ózgeristerge jedel den qoıý qajet

Májilis tóraǵasy Nurlan Nyǵmatýlın temeki ónimderine arnalǵan aksızder mólsherlemelerin aıqyndaý kezinde naryqtyń ózgerýine jedel den qoıý Qazaqstannyń múddelerin saqtaýǵa da, EAEO-tyń tıisti kelisimi sheńberinde elimizdiń mindettemelerin oryndaýǵa da yqpal etedi dep esepteıdi.

Búgin májilistiń jalpy otyrysynda «Eýrazııalyq ekonomıkalyq odaqqa múshe memleketterdiń temeki ónimderine aksızder salasyndaǵy salyq saıasatyn júrgizý qaǵıdattary týraly kelisimdi ratıfıkasııalaý týraly» zań jobasy maquldandy.

Kelisimge sáıkes 2024 jyldan bastap EAEO elderi temekige 1 myń dana úshin 35 eýro ındıkatıvtik mólsherlemeni tıisinshe 20%-ǵa aýytqý quqyǵymen qoldanýǵa tıis.

Bul rette temeki ónimderine aksızderdi kezeń-kezeńimen úılestirý kózdeledi.

Osy zań jobasyn talqylaý barysynda májilis tóraǵasy Nurlan Nyǵmatýlın eger ulttyq valıýtanyń eýroǵa qatysty baǵamy ózgerse bul temekige aksızdiń mólsherlemesine, sondaı-aq bólshek saýda baǵalaryna qalaı áser etetinine kóńil bólý kerektigin aıtty. 

Ulttyq ekonomıka mınıstri Áset Erǵalıev túsindirgendeı, baǵam kúrt ózgergen jaǵdaıda EAEO-ǵa múshe elderdiń árqaısysy aksızderdiń ındıkatıvtik mólsherlemesin qaıta qaraýdy surap, Eýrazııalyq ekonomıkalyq komıssııaǵa júginýge quqyqy bar jáne sheshim tolyq konsensýsqa qol jetkizilgen kezde, ıaǵnı EAEO-nyń barlyq músheleri kelisetin kezde qabyldanady.

Osyǵan oraı, Nurlan Nyǵmatýlın bul jerde kóp jaǵdaı Ulttyq ekonomıka mınıstrligi qyzmetkerleriniń, sondaı-aq, Eýrazııalyq ekonomıkalyq odaq komıssııadaǵy ókilderdiń, olardyń kýrstyń barlyq ózgeristerine jedel is-áreket etýlerine baılanysty bolatynyn atap ótip, osy kelisim sheńberinde Qazaqstannyń múddesin, elimizdiń mindettemelerin de saqtaý maqsatynda ýaqytyly sharalar qabyldaý qajettigin aıtty.

Jalpy, zań jobasy temeki ónimine arnalǵan aksızder mólsherlemelerin úılestirý jolymen EAEO sheńberinde temeki ónimderi naryǵynyń jumys isteýi úshin jaǵdaılardy qamtamasyz etýge baǵyttalǵan. Bul temeki ónimderiniń zańsyz aınalymyn tejeýge múmkindik beredi.

 Májilistiń baspasóz qyzmeti