Mınıstr: Synaqtardyń arqasynda myqty bola tústik

Bilim jáne ǵylym mınıstri Ashat Aımaǵambetov ustazdardy alǵys aıtý kúnimen quttyqtady.

– Búgin – alǵys aıtý kúni! Sizderdi meıirimdilik, jaqsylyq, dostyq pen izgiliktiń sımvolyna aınalǵan merekemen shyn júrekten quttyqtaımyn!

Pedagog-áriptesterime pandemııa men karantındik shekteýler jaǵdaıynda kásibılik tanytyp, qajyrly eńbek etkeni úshin erekshe alǵysymdy bildiremin! – dep jazdy mınıstr.

Aımaǵambetov ustazdarmen qatar, oqýshylar men stýdentterdiń ata-analaryna da alǵys bildirdi.

– Muǵalimder ýaqyttyń jańa syn-qaterlerin eńserý úshin tabandylyq tanytty. Synaqtardyń arqasynda myqty bola tústik.

Ustazdarǵa óz isine degen súıispenshilik pen balalarǵa degen sheksiz mahabbaty úshin alǵys aıtamyn. Osynaý qıyn kezeńde qoldaý kórsetip, túsinistik tanytqany úshin oqýshylarymyz ben stýdentterimizdiń ata-analaryna alǵysym sheksiz.

Bizdiń balalarymyz talantty ári aqyldy. Olar – elimizdiń bolashaǵy. Biz balalardyń sapaly bilim alyp, Qazaqstannyń laıyqty azamattary bolyp ósýi úshin qoldan kelgenniń bárin jasaımyz.

Barshańyzǵa myqty densaýlyq, otbasylaryńyzǵa baq-bereke jáne tolaǵaı tabystar tileımin! – dedi ol.