Foto: qamshy.kz
Almaty qalasy ákiminiń orynbasary Erjan Babaqumarov onlaın formatta megapolıs aýmaǵyndaǵy JOO rektorlarymen keńes ótkizdi.
«Elbasynyń bes áleýmettik bastamasy» aıasynda jataqhana qurylysynyń barysy qaraldy. Basty mindet – stýdent jastardyń ómir súrý jaǵdaılaryn jaqsartý, stýdentterdi jataqhanalardaǵy oryndarmen qamtamasyz etý.
Almatyda 6 jataqhana paıdalanýǵa berildi, 2 nysanǵa qurylys júrgizilýde, aıaqtaý 2022 jyldyń basynda josparlanýda. Sonymen qatar, 30 jataqhana qurylysy boıynsha daıyndyq jumystary júrgizilýde. Jańa nysandardy salý úshin barlyǵy 22 jer ýchaskesi anyqtaldy. Jalpy, Almatyda júrgizilip jatqan jumystar aıasynda 16 myńnan astam tósek-oryn qurý josparlanýda.
Keńeske Abaı atyndaǵy Qazaq ulttyq pedagogıkalyq ýnıversıtetiniń, Halyqaralyq bıznes ýnıversıteti (UIB), Kaspıı qoǵamdyq ýnıversıteti,Qonaev atyndaǵy Eýrazııalyq Zań Akademııasynyń, Q. Sátbaev atyndaǵy Qazaq ulttyq tehnıkalyq zertteý ýnıversıteti, Almaty tehnologııalyq ýnıversıtetiniń basshylyǵy qatysyp, sóz sóıledi.
Kóterilgen máselelerge qalalyq Jer qatynastary basqarmasynyń basshysy Ardaq Samambetov, Qala qurylysyn baqylaý basqarmasy basshysynyń orynbasary O.Tólebaev túsinikteme berdi.
Keńes qorytyndysy boıynsha ákimniń orynbasary Erjan Babaqumarov tıisti basqarmalarǵa «Halyq únine qulaq asatyn memleket» tujyrymdamasynyń qaǵıdattaryn eskere otyryp, jataqhanalar salý jónindegi jobalardy iske asyrý, sondaı-aq rásimdik máselelerdi jedeldetý jáne josparlanǵan obektilerdi ýaqtyly jáne sapaly paıdalanýǵa berýdi qamtamasyz etý boıynsha birqatar tapsyrmalar berdi.
Esterińizge sala keteıik, jataqhana qurylysy ınvestorlardyń qarajaty esebinen júzege asyrylýda. QR Bilim jáne ǵylym mınıstrliginiń sheshimderine sáıkes, nysan paıdalanýǵa berilgennen keıin 8 jyl ishinde ınvestorlar úshin ınvestısııalardyń qaıtarymy reglamenttelgen. Osyǵan baılanysty pandemııa jáne ınvestorlardyń ekonomıkalyq qıyndyqtary jaǵdaıynda qurylys merzimine ózgerister engizildi.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir