Áýezov teatrynda 4 jańa qoıylymnyń tusaýy kesildi

17-20 aqpan kúnderi Muhtar Áýezov atyndaǵy Qazaq memlekettik akademııalyq drama teatrynda 4 jańa qoıylymnyń tusaýy kesildi, dep habarlaıdy Qamshy tilshisi.

Olar: "Ekeýmiz..." dramasy, "Oń qol" horror dramasy, "Barymen bazar" komedııasy jáne "Týǵan kún" monodramasy.

"Ekeýmiz..." dramasy (qoıýshy-rejısseri N. Dýbs)

Dramatýrg O.Janaıdarovtyń pesasy jastar arasyndaǵy jelik sezim, stereotıptik kózqarastar, áleýmettik máseleler jáne otbasylyq qundylyqtar taqyrybyn qamtydy. Jeke adamnyń ózin-ózi tanı bilýi, ózgeniń janyn, jaqynynyń janyn sezine alýy, tyńdaı-kóre bilýiniń, túsinisý men jarasymnyń, keshirimniń qanshalyqty mańyzdylyǵyn uǵyndyratyn sátterge kýá etti.

"Oń qol" horror dramasy (qoıýshy-rejısseri A. Sharıpov)

Jazýshy T.Ábdiktiń "Oń qol" pesasynyń oqıǵa jelisi adam men qoǵam qatynasyn ərdaıym basty nazarda ustaıdy. Basty keıipker — Almanyń boıyndaǵy úzdiksiz júrip jatqan úreı men qorqynysh, ómir men ólim arasyndaǵy arpalys, jan tolǵanysy keńinen sýrettelip, qaterli derttiń sebep-saldaryn ashyp kórsetti.

"Barymen bazar" komedııasy (qoıýshy-rejısseri N.Jumanııazov)

Tynymbaı Nurmaǵanbetov – komedııa janrynda jazyp júrgen dramatýrgter ishindegi biregeıi. Avtordyń buryn esh jerde sahnalanbaǵan bul týyndysynda qazirgi qoǵamda bolyp jatqan ózekti máseleler ashy satıramen mysqyldanyp, kórermenderdi kúldire otyryp oıǵa batyrdy.

"Týǵan kún" monodramasy (qoıýshy-rejısseri E.Káribaev)

Ata-ananyń ystyq qushaǵy men aıaly alaqanyn sezinbeı, balalar úıinde tárbıelengen, boıjetken shaǵynda súıgen, senim artqan adamynan satqyndyq kórip, úmiti kekke ulasqan, taǵdyr tálkegine túsken áıeldiń jaı-kúıi "Týǵan kún" monodramasynda aıqyn kórindi.