Kranda salaqtaǵan tiri sıyrdyń hıkaıasy: 300 myń teńgege satyp aldyq...

Áp-sátte qasapshy bolyp ketken jumysshylardyń qylyǵy áleýmettik jeli qoldanýshylaryn qatty ashýlandyrdy. Al qurylysshylar qurbandyq shaldyq dep aqtalyp álek.

Oljas Esenalın, qurylys nysany aýmaǵynyń basshysy:

- Qıyn bolǵanda musylmandar qudaıdan ǵana kómegin suraıdy. Qurylyspen qıyn bolǵan da, adam bolmaǵan da. Qudaıdan surap, oıymyz sol boldy ǵoı. Astanada qazir qurban shalý, jetim-jesirge kómek kóp. Búkil etti ózimizge qaldyrmaı, taratyp jiberdik. Kranshyǵa ózim aıttym, "kóterip jiber" dedim. Endi ondaı bolmaıdy.

Sıyrdy tóbege kóterýdi qyzyq kórgen Oljas Esenalın janýardy 300 myń teńgege sharýa qojalyǵynan satyp alypty. Úıdiń tóbesinde quran oqyp baýyzdaǵannan keıin, ony jerge qaıta túsirip soıǵan. 250 kelideı et alǵan qurylysshy, "bes-bes keliden muqtaj adamdarǵa et tarattyq" deıdi. Kimge taratqanyn suradyq, ol múdirip qaldy. Beınekadrǵa salynyp jatqan úıge kórshi turatyndar túsirip úlgergen. Áýesqoı túsirilimnen sıyrdy kranmen kópqabatty úıdiń tóbesine kóterip jatqany anyq kórinedi. Tórt aıaǵy jipke baılanǵan baıǵus janýar julqynyp jatyr. Qurylys elordanyń sol jaǵalaýyndaǵy jańa temirjol vokzalynyń artynda júrgizilýde. Janýarǵa jaýyzdyq jasaǵan qurylysshynyń qandaı jazaǵa tartylatynyn polısııa departamenti áli sheshpepti.

Elmıra Sháýlenova, Nur-Sultan qalasy PD baspasóz qyzmetiniń jetekshisi:

- Oqıǵa bıyl 15 aqpanda saǵat 11:30-da Nájimedenov kóshesinde salynyp jatqan turǵyn úı kesheninde bolǵan. Polısııa qyzmetkerleri atalǵan oqıǵanyń barlyq qatysýshylaryn anyqtady. Fakti boıynsha tekserý júrgizilýde. QZ zańyna sáıkes shara qoldanylady.

KTK.KZ