"Mańǵystaý turǵyny koronavırýs vaksınasynan keıin qaıtys boldy"

Facebook áleýmettik jelisinde "Mańǵystaý oblysy Munaıly aýdany Batyr aýylynyń turǵyny COVID-19-ǵa qarsy ekpe alǵannan keıin qaıtys boldy" degen aqparat jarııalandy. QR DSM sanıtarlyq-epıdemıologııalyq baqylaý komıteti aqparatty joqqa shyǵardy.

Vedomstvonyń habarlaýynsha, Mańǵystaý turǵyny koronavırýs ınfeksııasyn ekpegen.

– 1978 jyly týǵan er adam 19 qańtarda qan qysymynyń kóterilýi saldarynan qaıtys boldy. Ol eshqandaı ekpe alǵan joq. Búginde Mańǵystaý oblysyna koronavırýs vaksınasy ákelingen joq. Vaksınanyń birinshi partııasyn óńirge 2021 jylǵy 28-29 qańtarda jetkizý josparlanǵan. Aıta keteıik, vaksınalaýmen birinshi kezekte juqpaly aýrýlar emhanalary, jedel medısınalyq járdem, reanımasııa, BMSK, qabyldaý bólmeleri, sanepıdqyzmetteriniń medısına qyzmetkerleri qamtylady. Marqum bolǵan azamat bul sanattardyń eshqaısysyna jatpaıdy, – dep túsindirdi sanıtarlyq-epıdemıologııalyq qadaǵalaý komıtetinde.

Sondaı-aq vedomstvo ókilderi kórineý jalǵan aqparat taratqany úshin jaýapkershilik qarastyrylǵanyn eske saldy. QR Qylmystyq kodeksiniń 274-babyna sáıkes, bul úshin 1000 aılyq eseptik kórsetkishke deıingi mólsherde aıyppul salý, ne bir jylǵa deıingi merzimge bas bostandyǵyn shekteý, ne sol merzimge bas bostandyǵynan aıyrý jazasy qarastyrylan.