Parlament májilisi saılaýyna qatysqan birneshe belgili tulǵalardyń telefondary sóndirýli tur. Solardyń qatarynda jýrnalıst, "Adal" partııasynyń múshesi Maqsat Tolyqbaı da bar.

Ol ekzıtpol nátıjesi jáne ortalyq saılaý komıssııasynyń aldyn ala qorytyndysy shyqqannan keıin áleýmettik jelide birneshe jazba jarııalaǵan.

Aldymen "Biz jeńdik. Erteńgi nátıjeni kúteıik. Málimdeme jasaımyn" dese, artynsha, "Saılaý ádil ótti" degen sózdi qudaıdan uıalmaǵan adam ǵana aıtatyn shyǵar?!" dep jazǵan.

Munan soń "Táýelsiz baqylaýshylardyń protokol nátıjesi endi bitipti. "Adal" partııasy 29 prosent daýyspen ekinshi oryn aldy. Eń kóp daýys bergen Mańǵystaý, Qyzylorda, Túrkistan oblysy" dep habarlaǵan.

Endi mine, ortalyq saılaý komıssııasy parlament májilisi saılaýynyń qorytyndy nátıjesin jarııalaǵannan keıin Maqsat Tolyqbaımen baılanysý múmkin bolmaı otyr. Qamshy tilshisi eks-kandıdattan saılaý nátıjesine baılanysty pikiri, endigi jospary týraly suramaq bolyp habarlasqanynda  telefony sóndirýli boldy.

OSK qorytyndysyna sáıkes, "Adal" partııasy májiliske ótýge múmkindik beretin 7 paıyz daýysty jınaı almady.

Sondaı-aq qarjy sarapshysy Dáýlet Muqaev, sportshy Ardaq Nazarov, jýrnalıster Zeıin Álipbek pen Dáýren Qýat sekildi úmitkerlerdiń de telefony sónip tur. Aldyńǵy eki kandıdat "Adal partııasynyń múshesi bolsa, sońǵylary saılaýǵa "Aýyl" partııasynan túsken. 

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir