Nurlan Nyǵmatýlın memlekettik marapattardy tabys etti

Táýelsizdik kúni qarsańynda Májilis Tóraǵasy Nurlan Nyǵmatýlın depýtattarǵa jáne Apparat qyzmetkerlerine Prezıdent Jarlyǵymen berilgen memlekettik marapattardy tapsyrdy.

Nurlan Nyǵmatýlın Táýelsizdik kúniniń barlyq qazaqstandyqtar úshin mańyzdylyǵy, elimizdiń osy jyldardaǵy jetistikteri týraly aıtyp:

-Tuńǵysh Prezıdentimiz, Elbasy Nursultan Ábishuly Nazarbaevtyń kemel saıasatynyń arqasynda búkil álemge jedel damýshy el retinde tanymal boldyq. Zamanǵa saı bilimdi, rýhty urpaqtarymyz ósip keledi, - dedi.

Sondaı-aq, Palata Spıkeri Qazaqstanymyz dúnıejúziniń saıasatkerleri, órkenıetti el basshylary, álemdik qaıratkerler bas qosatyn syıly shańyraqqa aınalǵanyn, búgingi kúni Memleket Basshysy Qasym-Jomart Kemeluly Toqaev osy tolaǵaı tabystarymyzdy saqtap, strategııalyq damý baǵytyn odan ári jalǵastyryp jatqanyna nazar aýdardy.

Nurlan Nyǵmatýlın depýtattyq korpýstyń elimizdi odan ári jańǵyrtý boıynsha Elbasy men Memleket Basshysy qoıǵan barlyq mindetterdiń oryndalýyn zańnamalyq turǵydan qamtamasyz etý úshin qazirgi kúrdeli jaǵdaıda jumystyń jańa nysandary men mehanızmderin engizgenin atap ótti.

 Memlekettik jáne qoǵamdyq qyzmeti úshin, elimizdiń áleýmettik-ekonomıkalyq jáne mádenı damýyna, halyqtar arasyndaǵy yntymaqtastyq pen dostyqty nyǵaıtýǵa qosqan eleýli úlesi úshin III dárejeli «Barys» ordeni Májilis depýtaty Omarhan Oksıkbaevqa berilse, «Parasat» ordeni Jeksenbaı Dúısebaevqa jáne Danııa Espaevaǵa tabys etildi. «Qurmet» ordeni  Jambyl Ahmetbekov ıe boldy. Al, «Eren eńbegi úshin» memlekettik medali Apparat qyzmetkerleri Narıman Álǵojınge, Botagóz Botabaevaǵa jáne  Klara Máýtenbaevaǵa berildi.

Qazaqstan Respýblıkasynyń Qurmet gramotasy Apparat qyzmetkerleri Aıtbek Álipov, Aıgerim Nurjanova jáne Tatıana Syzdyqovaǵa tabystaldy.

Sonymen qatar Májilis Tóraǵasy TMD Parlamentaralyq Assambleıasynyń «Dostyq» ordenin Bas prokýrordyń orynbasary Marat Ahmetjanovqa, TMD Parlamentaralyq Assambleıasynyń «Parlamentaralyq yntymaqtastyqty nyǵaıtý úshin» medali Ádilet mınıstri Marat Beketaevqa jáne Májilis depýtaty Sergeı Zvolskııge berildi. TMD Parlamentaralyq Assambleıasynyń Qurmet gramotalaryn Ábdimanap Bekturǵanov pen Muhtar Erman aldy.

Is-shara barysynda Palata Spıkeri Nurlan Nyǵmatýlın zań jobalarymen tıimdi jumys isteý jáne parlamentaralyq baılanystardy keńeıtý úshin memlekettik organdar ókilderiniń depýtattyq korpýspen ózara is-qımylynyń mańyzdylyǵyn atap ótti.

Sondaı-aq, Memleket Basshysynyń Jarlyǵymen Qazaqstan Respýblıkasynyń Abaı atyndaǵy ádebıet pen óner salasyndaǵy memlekettik syılyǵyna Májilis depýtaty Saýytbek Abdrahmanov  «Abyz Ábish» zertteýi úshin ıe boldy.