Abaı Qunanbaıulynyń 175 jyldyǵyna jas sýretshi aqynnyń músinin jasady

Nur-Sultanda Abaı Qunanbaıulynyń 175 jyldyǵyna jas sýretshi Aıdos Esmaǵambetov erekshe músin jasap, aqynnyń beınesin aınytpaı keskindegen. Qazirgi ýaqytta músin «Qazaqstan» ortalyq konsert zalynda ornalasqan. 

Aıdos Esmaǵambetov – elimizde áli damı qoımaǵan gıperrealızm dep atalatyn jańa tehnologııanyń ókili. Onyń esimi «Qazaqstannyń 100 Jańa esimi» jobasyna engen. On saýsaǵynan bal tamǵan talant ıesi fotosýretke qarap uly tulǵalardyń músinderin jasaıdy.

«Negizi psıhologııada bar ǵoı, 5 mınýt degen. Adam ózi istegisi kelmeı turǵan dúnıege 5 mınýt óz-ózin májbúrlep istese, ári qaraı qol ózi ketip qalady da, sol álemge kirip ketip, jasap ketesiz degen.  Usaq-túıek, janaǵydaı bir-birlep shashyn qadap jasaý maǵan unaıdy. Jumys qıyn bolǵan saıyn maǵan sonshalyqty erekshe. Men odan lázzat alamyn. Jasaǵan eksponattarymdy anaýy ystyq, mynaýy jaqyn dep  bólip-jaryp aıta almaımyn. О́zimniń qolymnan jasalǵan barlyq týyndy men úshin ystyq», – dedi músinshi Aıdos Esmaǵambetov.

Músinshiniń alǵashqy týyndysy Amerıkanyń burynǵy kóshbasshysy Barak Obama. Odan keıin, Qazaqstannyń tuńǵysh prezıdenti Nursultan Nazarbaevtyń, Qazaqstannyń birinshi qorǵanys mınıstri Saǵadat Nurmaǵambetovtiń, Úsh júzdiń basyn qosqan Abylaı hannyń beınelerin jasaǵan.  Sońǵy týyndysy Qazaqtyń Uly aqyny Abaı Qunanbaıulynyń 175 jyldyq mereıtoıyna arnalǵan músin. Ony Hákim Abaıdyń tupnusqa fotosýretine qarap otyryp keskindegen. Aıta ketý kerek, fotosýret arnaıy Semeı qalasyndaǵy Uly aqynnyń atyndaǵy murajaı sóresinen alynypty.

Adamnyń músinin jasaǵanda ár múshesi, detali erekshe nazardy talap etedi. Ásirese, kózin salý qıyn, deıdi Sýretshi Aıdos Esmaǵambetov. Birde formasy durys bolmaı qalsa, endi birinde jasaǵan kóz kóbiktenip ketetin kórinedi. Tipti, kózdiń qan tamyrlary men daqtaryn salý  úshin asqan tózimdilik pen sabyrlyq qajet. Máselen,  bir músinniń kózderin jasap shyǵarý úshin 2 kún ýaqyt ketedi eken.  

Músinshi fotosýretten adamnyń anatomııalyq erekshelikterin muqııat zertteýdi meńgergen. Eń birinshi, ermeksazdan negiz jasap, sodan keıin gıpsti, artynan sılıkon qoldanady. Sýretshiniń aıtýynsha kóbisi balaýyzben jasaıdy dep shatastyrady deıdi. Onyń ózin arnaıy tapsyryspen AQSh-tan aldyratyn kórinedi.

«Áleýmettik jelilerge jazyp jatady. Kórgen adam, tanystar da aıtyp jatady, siz osy bir ortalyq ashsańyz jaqsy bolýshy edi. Balalarymyzdy berip, sýret ónerine baýlytar edik dep. Men bári ýaqyty kelgende bolady dep aıtamyn. Buıyrsa ashamyz. Ol ashylýy kerek. Mindetti túrde shákirtterim kóbeıý kerek. Sýret álemin seziný kerek. Qazirden bastap, akvarel, gýashtarmen sýret sala berý kerek», – dedi músinshi Aıdos Esmaǵambetov.

Bolashaqta Aıdos Esmaǵambetov gıperrealızmniń jas býynyn oqytý úshin mektep ashýdy jáne ónerdiń osy túrin elimizde jańa deńgeıge shyǵarýdy armandaıdy. Onyń josparynda Qazaqstanda músinder murajaıyn ashý da bar.