Belarýste jeksenbi kúni 380-nen astam adam ustaldy

Belarýste jeksenbi kúni Aleksandr Lýkashenko rejımine qarsy ruqsat etilmegen narazylyq aksııalary ótti. Bul týraly ria.ru habarlady. 

О́tken jeksenbide (29 qarashada) Mınsk pen Belarýstiń ózge qalalarynda ádettegideı narazylyq aksııasy ótti. Qalalyq ishki ister basqarmasy demonstranttardyń kóshege "tirkelmegen sımvolıka jáne plakat" ustap shyqqanyn aıtyp, jol qozǵalysyna kedergi keltirgenin alǵa tartqan. 

"Vesna" quqyq qorǵaý ortalyǵynyń málimetinshe, narazylyq sherýge shyqqan 384 adam ustaldy.  Mınsk polısııasy  jeksenbide 250-ge jýyq adam ruqsat etilmegen narazylyq aksııasyna qatysqany úshin ustalǵanyn habarlady. 

Jeksenbi tańerteń Mınskide bılik qala ortalyǵyndaǵy onnan astam metro stansııasyn jaýyp, mobıldi ınternetti óshirgen.

Belarýs oppozısııasy dástúrli túrde jeksenbide Mınskide sherý formatynda narazylyq aksııalaryn ótkizedi. Bul joly Mınskide oppozısııa jaqtastary qalanyń ártúrli aýdandarynda jergilikti mıtıngterge kolonna bolyp jınaldy, qaýipsizdik kúshteri olarǵa kedergi keltirip, adamdardy ustap áketip otyrǵan. 

9 tamyzda ótken prezıdent saılaýynan keıin Aleksandr Lýkashenko altynshy ret jeńiske jetti, ol OSK málimetteri boıynsha 80,1% daýysqa ıe bolǵan. Saılaý nátıjesimen kelispegen oppozısııa sodan beri turaqty túrde jappaı narazylyq aksııalaryn ótkizip keledi. Oppozısııa Svetlana Tıhanovskaıa jeńdi dep sanaıdy. Narazylyq bildirýshilerge qarsy áreketterdi taratý kezinde qaýipsizdik kúshteri kózden jas aǵyzatyn gaz, sý atqysh, granatalar, rezeńke oqtar qoldandy. Narazylyq aksııasy áli jalǵasýda.