Mamyr aıynda ókilettigi toqtatylǵan eks-senator Darıǵa Nazarbaevanyń aldaǵy májilis saılaýy qarsańynda "Nur Otan"-nyń partııalyq tizimine enýi áleýmettik jelide qyzý talqylanyp jatyr. 

2020 jylǵy 2 mamyr kúni Darıǵa Nazarbaevanyń senat tóraǵasy retindegi ókilettigi toqtatylǵan. Bul qyzmetke ol 2019 jylǵy 20 naýryzda taǵaıyndalǵan. Oǵan deıin ártúrli jyldary "Habar" agenttiginiń tóraǵasy, májilis depýtaty, vıse-premer qyzmetterin atqarǵan.

Nazarbaeva sońǵy qyzmetinde konstıtýsııa boıynsha prezıdentten keıingi tulǵa bolǵan. Áleýmettik jelide "Toqaev otstavkaǵa ketip, onyń ornyna Nazarbaeva otyrady-mys" degen áńgime taraǵan. Alaıda ol aqparatty resmı oryndar áldeneshe ret teristegen.
 
Darıǵa Nazarbaev 2013 jyly Qazaqstannyń eń baı 50 adamynyń qataryna kirgen. Forbes Qazaqstan jýrnaly jarııalaǵan eldiń eń dáýletti bıznesmenderiniń 2019 jylǵy tizimine Nazarbaeva enbegen.
 
Bıyl Darıǵa Nazarbaev aınalasynda birneshe daýly oqıǵalar boldy. 16 tamyzda ómirden ótkeni habarlanǵan uly Aısultan Rahat jyl basynan beri áleýmettik jelide anasy men naǵashy atasy Nursultan Nazarbaev týraly birneshe shýly málimdeme jarııalaǵan.
 
Sondaı-aq Nazarbaevanyń Londondaǵy áskeýde qymbat múlki bary týraly aqparattar shyqqan. Nazarbaeva men onyń úlken uly Nurálı Álıevke tıesili Londondaǵy úsh qymbat úı buǵattalyp, artynsha buǵattan shyǵarylǵan. Uzamaı youtube jelisinde Darıǵa Nazarbaevanyń "Den pobedy" ánin aıtyp, bılep júrgen vıdeosy tarady. Keıbir jeli qoldanýshylary vıdeodaǵy jaǵdaıdy Londondaǵy múlikten buǵattaýdyń alynýymen baılanystyrǵan.
 
Osyndaı vıdeolar men ózi jetekshilik etetin Nursultan Nazarbaev atyndaǵy qordyń sharalarynda tóbe kórsetkeni bolmasa, Darıǵa Nazarbaeva ókilettigi toqtaǵannan keıin jurt kózine kóp túse bermedi.
 
Endi mine, "Nur Otan" partııasynyń májilis saılaýyna usynǵan partııalyq tizimine enip otyr. Osy másele boıynsha Qamshy tilshisine pikir bildirgen sarapshylardyń biri "Nazarbaevanyń kandıdat atanýǵa moraldyq quqyǵy joq" dese, biri bul – mán beretindeı oqıǵa emestigin aıtty.

Akademık Hangeldi Ábjánov Darıǵa Nazarbaevanyń saıasatqa oralýyn quptamaıtynyn jetkizdi.

 

–  Úlken saıasatta minsiz, kirshiksiz adam júrýi kerek dep sanaımyn. Al Darıǵa Nursultanqyzy bir kezderi kóptegen daýly oqıǵalardyń ortasynda júrdi. Shetelde úlken uly Nurálı Álıev ekeýiniń záýlim saraılarynyń aınalasynda da daý shyqqany jurtshylyqqa málim. Al ol saraılardyń qandaı aqshaǵa satyp alynǵany múlde jumbaq nárse. Kesimdi aılyqpen memlekettik qyzmette istegen adam ondaı múlikti qaı aqshasyna alady? Qaıtys bolyp ketken uly áýlettiń jaǵymsyz jaqtaryn aıtyp ketkeni taǵy bar. Darıǵa saıasatqa kelmeı-aq, óziniń jeke sharýalarymen aınalysyp júre berýi kerek edi. Qazir halyq bárin kórip, bilip otyr. Halyqty aldaı almaısyń, – dedi tarıhshy.

 

Ǵalymnyń aıtýynsha, Darıǵa Nazarbaevanyń saıasatqa kelýine qajettilik te bolmaǵan.

– Darıǵanyń úlken bastamalaryn, úlken máselelerdi sheshkenin kórmedik. Onyki "Ata dańqymen qyz óserdiń" keri ǵoı. Bul máselede men Nurotandy qoldamaımyn. Nurotan osy arqyly abyroı jınaı almaıdy, – dep atap ótti akademık.

Saıasattanýshy Ázimbaı Ǵalı eski kúshter men jańa kúshterdiń kúresi udaıy júretinin, túbinde jańa kúshter jeńedi dep sanaıtynyn aıtyp, prezıdent Toqaev saıası kúrestiń joldaryn meńzegenine nazar aýdardy.

 

– Darıǵa sekildi eski ákimshilik júıeniń sımvoldary kúreske qatysqaly jatqany tańǵalarlyq dúnıe emes. Biraq qoǵam óziniń tańdaýyn jasaıdy. Qazir azamattardyń 65 paıyzy qalada turady. Saıası belsendilik artyp keledi. Baıqasaq, Toqaev "bizdiń demonstrasııa jasaýǵa quqyǵymyz bar" dedi. Sondyqtan saıası kúres jolyn prezıdenttiń ózi meńzep tur, kórip tur, bilip tur. Bul úrdis kúres arqyly Toqaevtyń jeńisimen aıaqtalady. Qoǵam alǵa jyljıdy. Súıkimi ketetinderdiń súıkimi ketedi. Bıliktegi adamdardyń desakralızasııasy qashyp qutyla almaıtyn úrdis, – dedi Ázimbaı Ǵalı.

 

Saıasattanýshy Dos Kóshim Darıǵa Nazarbaevanyń úmitkerler tizimine enýine mańyz berýdiń qajeti joq ekenin atap ótti. Saıasattanýshy "Nursultan Nazarbaevtyń qyzy bolǵandyqtan ǵana Darıǵa Nazarbaevanyń tulǵasyn erekshelemeý kerek. Onyń kóktemdegi otstavkasy osy sózdi dáleldeı túsip, "Nazarbaev bılikti qyzyna mura etip berip ketedi" degen ssenarııdi joqqa shyǵardy" dep aıtty.

– Men úshin Darıǵa Nazarbaeva Nurotandaǵy júzdegen úmitkerlerdiń, beligili bir baǵytty ustanǵan toptyń biri ǵana. Olardan esh erekshelenbeıdi. Darıǵadan bólek, qaıtadan usynylyp otyrǵan birneshe adam bar. Nazarbaeva solardyń qataryndaǵy adam ǵana. Áńgime basqada. Saıası ońy men solyn tanıtyn adam qazir joǵaryǵa (bılikke – red.) barmaıdy. О́ıtkeni júıeni jalǵyz-jarym ózgerte almaısyń. Júıe degen top. Eshqandaı "kitaphana", "aqorda" degen joq Olar bireý-aq jáne bılikti ýystarynan shyǵarǵysy kelmeıdi. Sondyqtan onyń ishinde Nazarbaevany bólek qaraýdyń reti joq, – dedi ol.

Saıasattanýshy Andreı Chebotarıov Darıǵa Nazarbaevanyń úlken saıasatqa oralatyny kútilgen oqıǵa bolǵanyn aıtyp, "ol májiliste komıtetterdiń birin basqarýy múmkin nemese májilis spıkeri atanýy yqtımal" dedi.

 
Melis Seıdahmetov

Almaty oblysy Kerbulaq aýdany Qyzyljar aýylynda týǵan. Ál-Farabı atyndaǵy Qazaq ulttyq ýnıversıteti fılosofııa jáne saıasattaný fakýltetin bitirgen. 2015-2019 jyldary «Prezıdent jáne Halyq» gazetinde tilshi, shef-redaktor bolyp istegen. 2019 jyldan beri Qamshy portalynda qyzmet atqarady. Qamshy.kz saıtynyń bas redaktory.

Avtormen onyń Facebook paraqshasy arqyly habarlasýǵa bolady.

Jazylyńyz

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir