Taýly Qarabaq soǵysynan keıingi ómir: "Aýrýdan uıyqtaı almaımyn" (vıdeo)

Ázerbaıjan men Armenııa arasyndaǵy soǵys aıaqtalǵanymen eki el azamattary soǵystyń zardabyn áli tartyp jatyr, dep jazady Qamshy.kz aqparat agenttigi BBC-ge silteme jasap.

Zamın Bandalıev ólim aýzynan aman qaldy. Dárigerler onyń jaraqatyn emdegen saıyn ol ólimmen betpe-bet kelgen sátke qaıta oralatyndaı.

Ákesi balasynyń qınalǵanyn kórmeý úshin úıden shyǵyp ketedi.

– Balamdy kórgende eseńgirep qaldym. Zamınniń kóligin kórgende onyń qaza bolǵanyna senimdi edim. Birinshi qudaı, odan keıin medısına qyzmetkerleriniń arqasynda balam aman qaldy. Bomba mashınanyń júk salǵyshynyń kúl-talqanyn shyǵarǵan. Snarıad metall men oryndyqty tesip shyqqan. Balamnyń janynda eshkim otyrmaǵanyna shúkir. Ol adam aman qalýy eki talaı edi. Kenetten qatty daýys shyqty, artynsha jarylys boldy. Men daýysty estidim, biraq eshteńe esimde joq. Sebebi esimdi joǵalttym. Meni aýrýhanaǵa jetkizdi. Men áli kúnge deıin aýrýdan durys uıyqtaı almaımyn. Durys demala almaǵandyqtan kóp sóıleı almaımyn, – deıdi Zamın Bandalıev.

Ázerbaıjan 28 qazanda Armenııanyń tyıym salynǵan kassetalyq bombany paıdalanyp Bardaǵa oq jaýdyryp, saldarynan 20 beıbit turǵyn qaza tapqanyn málim etti.  

Eki elde de kassetalyq bombany qoldanýǵa tyıym salynǵan. Armenııa da, Ázerbaıjan da atalmysh bomba túrin qoldanbaǵanyn aıtady.

Adam quqyǵyn qorǵaıtyn top aqparattyń ras-ótirigin anyqtady. Tekseris jumysy barysynda kassetalyq bomba qoldanylǵany anyqtaldy.

Armenııa Agdam janyndaǵy jerdi 1990 jyldary tartyp alǵan. Soǵysty toqtatý maqsatynda bul jer Ázerbaıjanǵa qaıtyryldy.

– Men Agdamdy, aýylymyzdy eshqashan kórgen emespin. Men óz jerimdi kórgim keledi, – deıdi Ázerbaıjan turǵyndarynyń biri.

Fýzýlı Ázerbaıjanǵa qaıtarylǵan ekinshi jer. Fýzýlıdiń burynǵy turǵandary úılerin kórý úshin keldi.

– Men 52 jyl tájirıbesi bar muǵalimmin. Men Fýzýlıde dúnıege keldim.  Búgin óz úıimniń aldynda turmyn. Qazir qandaı sezimde ekenimdi sózben aıtyp jetkizý múmkin emes, – deıdi qalanyń burynǵy turǵyny.

Kóp adam áli úıine orala almaı otyr. Olar Ázerbaıjan bıligi qalany mınadan tazartýyn kútýde.