QazAgro: Jeńildetilgen nesıe eksportty qoldaýǵa baǵyttalady

«Agrarlyq nesıe korporasııasy» «QazAgro» UBH enshilik kompanııasy elimiz boıynsha 272,2 mlrd teńgeden astam somaǵa 298 ınvestısııalyq jobany qarjylandyrdy. Bul rette ANK aýyl sharýashylyǵy ónimderin eksportqa baǵdarlaı otyryp, óndiristi damytatyn jobalardy qarjylandyrý kólemin arttyryp otyr. Jeńildetilgen nesıe fermerlerge Qazaqstannyń azyq-túlik qoryn qamtamasyz etip qana qoımaı, aýylda jańa turaqty jumys oryndaryn ashýǵa, úlken ınvestısııalyq jobalarmen jumys isteýge múmkindik beredi.

Qazir Qazaqstanda balyq óndirisi basty nazarǵa alynyp otyr. Tamyz aıynda premer-mınıstr Asqar Mamın qazaqstandyqtardy aqýyzǵa baı azyq-túlikpen qamtamasyz etý úshin ony barlyq óńirlerde damytýdy tapsyrdy. Ázirge Qazaqstanda balyqty tutyný kólemi asa úlken emes. (DDU-nyń bekitken balyqty ortasha tutyný mólsheri 16 kg bolsa, bizdegi kórsetkish 3-4 kg quraıdy). Jańadan ashylǵan jáne jumys istep turǵan balyq sharýashylyqtaryn qoldaý endi basymdyqqa ıe.

Osy turǵydan ANK qorjynynda atalǵan baǵyt boıynsha 10 joba bar. Shetelderdegi balyqqa degen suranysty eskersek, olardyń barlyǵy aıtarlyqtaı eksporttyq áleýetke ıe.

Osyndaı jobalardyń biri – Shyǵys Qazaqstan oblysynyń Samar aýylyndaǵy "Kýzmıch" JShS. Ol bekire jáne albyrt balyqtaryn qosa alǵanda, baǵaly balyq tuqymdaryn ósirýmen aınalysady. Kompanııa ANK-dan kásibin keńeıtý maqsatynda 50 mln teńge kóleminde nesıe alǵan. ANK-nyń sharýashylyqty qarjylandyrýynyń arqasynda kishigirim sehtan aýyldaǵy áleýmettik damýmen de, balyq ósirýmen de aınalysatyn úlken óndiris ornynyń deńgeıine deıin jetip otyr.

Kompanııa 2018 jyly jeńildetilgen nesıe boıynsha qoldaýǵa ıe boldy. 2021 jylǵa qaraı jylyna 100 tonna balyq óndirýdi josparlap otyr.

"Biz ónimderdi Reseı, Qytaı, Ázerbaıjan men Grýzııaǵa da eksporttaımyz. Ol jerge kókserke, shortan, alabuǵa, taban balyqtaryn jiberemiz. Qazaqstandyq ónimder suranysqa ıe. Sonymen qatar olar bizdiń daıyn ónimderdi – fıle men tartylǵan etti, jańa muzdatylǵan balyqty da satyp alady", – deıdi kompanııa dırektorynyń orynbasary Baqyt Múbarakova.

Agrarlyq nesıe korporasııasyna qatysty taǵy bir joba – "Elim-aı Kókpekti" sharýa qojalyǵyndaǵy 5 myń iri qara maldy bordaqylaý alańy. Bul alań – eń aldymen, aımaqtar úshin jáne ShQO-nyń shaǵyn fermerlik sharýashylyqtaryn qoldaý úshin mańyzdy.

Atalǵan joba 2018 jyly sharýa qojalyǵy ANK-dan jeńildetilgen nesıe alǵan kezde bastalǵan. Mal bordaqylaý alańynyń 1 mlrd teńgege jýyq qunynyń 600 mln-ǵa jýyǵy nesıege alynǵan.

"Bul aımaqtar úshin jáne shaǵyn fermalardyń damýy úshin mańyzdy, sebebi olar bizge óz maldaryn bere alady. Bizdiń mindetimiz – ony bordaqylaý jáne ishki nemese syrtqy naryqta satý", – deıdi "Elim-aı Kókpekti" kompanııasynyń basshysy Bolat Bekberdınov.

Kompanııa 300-den astam shaǵyn fermerlik sharýashylyqpen maldyń et ónimdiligin arttyrý úshin buqalardy jalǵa berý boıynsha birlese jumys isteıdi.

Sonymen qatar, Kókpekti aýylynda mal bordaqylaý alańyn qurý arqyly jergilikti jumysshylar úshin 100-den astam jańa jumys orny ashylady. Oǵan qosa, kompanııa áleýmettik damýmen kópten beri aınalysyp keledi. Mysaly, qyzmetkerlerdiń balalary úshin tegin balabaqsha jumys isteıdi.

"Kýzmıch" jáne "Elim-aı Kókpekti" jobalaryn iske asyrý aýyldaǵy áleýmettik damý úshin mańyzdy. О́ıtkeni, olar tikeleı jáne janama túrde jańa jumys oryndaryn ashady. Mysaly, balyq sharýashylyǵynyń keńeıýi 30 jumys ornyn ashýǵa múmkindik berse, al bordaqylaý alańy taǵy 150-ge jýyq jumys ornymen qamtamasyz etedi. Bul – shaǵyn sharýashylyqtarda jumyspen qamtýdaǵy eleýli úles.