Toqaev: Medısına qyzmetkerleri aqshany ótinip suraýǵa tıis emes

Qazaqstan prezıdenti Qasym-Jomart Toqaev koronavırýs indetiniń ekinshi kezeńine daıyndyq máseleleri boıynsha keńeste medısına qyzmetkerlerine tıesili qarjy týraly aıtty, dep habarlady Aqorda saıty.

– Indettiń ekinshi tolqyny jaǵdaıynda negizgi soqqyny taǵy da medıkter ózderine alady. Dári-dármek pen apparattar emes, dál solar bizdiń negizgi resýrstarymyz sanalady. Medısına qyzmetkerlerin qoldaý qajettigi eshkimge kúdik týdyrmaıdy. Meniń tapsyrmammen ekinshi jartyjyldyqta tólemaqyǵa 150 mlrd teńgeden astam qarjy bólindi. Degenmen, tólemaqy men saqtandyrý tólemin alýda áli kúnge deıin bıýrokratııalyq kedergiler jasalyp, tipti bul máselemen parlament te aınalysty. Jergilikti jerlerde tólemaqy boıynsha "sıfrlarmen oıyn" jalǵasyp, olardy bólýdiń áli kúnge deıin ashyqtyǵy joq. Bul jol berýge bolmaıtyn ahýal. Buǵan qosa, bas dárigerler jumys ýaqytyn dárigerdiń paıdasyna emes túzetýge tyrysady. Medısına qyzmetkerleri ózderine tıesili aqshany ótinip surap alýǵa tıis emes, – dedi prezıdent.

Sonymen qatar Toqaev koronavırýstan qaıtys bolǵan dárigerlerdiń otbasyna tekserý júrgizilmesten tólemaqy berilýi kerektigin aıtty.

– Qazir bul jaǵdaılar túrli komıssııada qaralyp, ótemaqy tek 37 ǵana otbasyǵa tólengen. Múldem jol berýge bolmaıtyn jaǵdaı. Postfaktým ólim sebebin anyqtaý kóptegen qıyndyqtardy, onyń ishinde ádep sıpatyndaǵy qıyndyqtardy týdyrady. Osyǵan oraı Úkimetke bul máselede mundaı tekserýler júrgizbesten qaza tapqan medısına qyzmetkeriniń otbasyna tıesili barlyq tólemaqyny tóleýdi tapsyramyn, – dedi Qasym-Jomart Toqaev.