Án álemindegi áıgili talant Shámshi Qaldaıaqov ánderi tuńǵysh qýyrshaq teatrynda

Jańashyldyqqa qumar tárbıe mekeni – Almaty Memlekettik qýyrshaq teatry zaman talabyna saı túrli baılanys quraldaryn shyǵarmashylyq jańalyqtarmen utymdy úılestire otyryp kórermendermen josparly da júıeli, sapaly da paıdaly tyǵyz qarym-qatynas jasaýdy negizgi jumys barysyna aınaldyryp otyr.

Teatr ujymy qoıylym sahnalaýda óziniń baǵyt-baǵdaryn túrli janrlar men san alýan taqyryptarǵa oıystyryp, kórermenniń jas ereksheligi men qyzyǵýshylyǵyna qaraı jańashyl týyndylardy sahnaǵa shyǵarýda. Osy oraıda, jýyrda qýyrshaq teatrynyń sahnasynda asa kórnekti sazger Shámshi Qaldaıaqovtyń 90 jyldyq mereıtoıyna oraı "О́mir – О́zen" mýzykalyq teatrlandyrylǵan qoıylymy bıylǵy 30 qyrkúıekte kórermenderge tuńǵysh ret jol tartpaqshy.

Ǵajaıyp sazy, kórkem tabıǵaty, lırıkalyq álemi, nazdylyq sıpatymen mıllıondaǵan tyńdarmannyń júreginen ardaqty oryn alǵan kórnekti kompozıtor, qazaq estradasynyń negizin salýshy – Shámshi Qaldaıaqov ánderin spektakl rejısseri Erkebulan Qabdyl búgingi kún kórermenderine laıyqtap, talant tabıǵatyn aıqyndaıtyn ózgeshe qyrlaryn názik elementtermen tolyqtyra, jańasha baǵytta kórsetýdi basty nazarǵa alǵan. Sazger ánderi arqyly rejısser kórermenderge izgi qasıetter mahabbat, súıispenshilik, otanshyldyq, rýhshyldyq syndy rýhanı qajettilikterdi sińirip, ulttyq naqyshpen nárlengen qazynaly azyq syılaýdy maqsat etken.

Án álemindegi áıgili talant, qazaq estrada ániniń qaınar bulaǵy ispettes bolǵan umytylmas týyndylardyń avtory Shámshi Qaldaıaqovtyń óshpes murasy, saǵynysh sazy, ásem álemin Almaty Memlekettik qýyrshaq teatry "О́mir – ózen" mýzykalyq qoıylymynda usynbaqshy. Teatrdyń YouTube kanalynda alǵash ret onlaın kórsetilimi ótetin bolmysy bólek premeradan qapy qalmańyz, qadirli kórermen! 

Madına TО́LE