Janbolat Mamaı men onyń jaqtastary Aqorda aldynda "ustaldy"

Aqordaǵa kirmek bolǵan belsendi Janbolat Mamaı men onyń jaqtastaryn polısııa ustap alyp ketti.

Demokratııalyq partııa qurý boıynsha bastamashyl top jetekshisi Janbolat Mamaı pandemııa kezinde halyqtyń turmysy tómendep, áleýmettik jaǵdaıy nasharlaǵanyn aıtyp, osydan birneshe aı buryn birrettik nesıe amnıstııasyn ótkizý bastamasyn kótergen. Bastamany el boıynsha 100 myńǵa jýyq adam qoldaǵan.

Qoǵam belsendisi 4 tamyz saǵat 11:00-de Aqordaǵa 100 myń adamnyń aryzyn tapsyrýǵa baratynyn birneshe kún buryn habarlaǵan. Mamaı men onyń jaqtastary keshe Nur-Sultan qalasyna kelgen.

Búgin Aqorda aldyna jınalǵan qoǵam belsendilerin polısııa qyzmetkerleri karantın bolǵandyqtan Aqordaǵa kirgizbeıtinin málim etip, qujattaryn tapsyryp, ózderine taraýyn surady.

Janbolat Mamaı qujatty jeke ózi Aqordaǵa kirip tapsyratynyn, taramaıtynyn aıtqan soń polısııa olardy qarsylyq tanytty dep ustap, kólikke salyp alyp ketti.

Janbolat Mamaı on jyldan astam ýaqyttan beri bılikti ótkir synap kele jatqan belsendi. Jańaózen oqıǵasynan keıin "áleýmettik arazdyqty qozdyrdy" degen aıyppen tutqyndalǵan. Artynsha "shyn ókinýine baılanysty qylmystyq jaýaptylyqtan bosatý" baby boıynsha bosap shyqqan.

Belsendi keıin de bılikti synaýyn toqtatqan emes. Únemi bılikke qarsy mıtıngilerge shyǵyp, rejımniń aýysýyn talap etip júr.

2019 jyldyń kúzinde Demokratııalyq partııa quratynyn málimdegen. Partııanyń quryltaıyn ótkizgeli jatqanynda jaqtastary tutqyndalyp, quryltaı ornyna bılikke qarsy beıbit mıtıng ótkizgen.

P.S. Qazaqstandaǵy mıtıngilerdiń basym kópshiligi osyndaı ssenarıı boıynsha ótedi. Ulttyq qoǵamdyq senim keńesiniń bastamasymen mıtıngi týraly jańa zań qabyldanǵanyna qaramastan, oıyn beıbit túrde bildirýge shyqqan azamattardy ustaý, qamaý áli toqtaǵan joq. Sondyqtan Qamshy portaly sanaýly saǵattan keıin bolatyn oqıǵanyń osylaı órbıtinin boljap otyr.