"О́zimiz satyp alǵan ottegi ballonyn tartyp aldy". Shymkent turǵyny anasynyń ólimine kinálilerdi izdeıdi

Shymkent turǵyny Aıjan Ergeshova pnevmonııamen aýyryp, emdelýge barǵan anasy dárigerlerdiń salǵyrttyǵynan kóz jumǵanyn, ózderiniń aqshasyna satyp alynǵan ottegi ballonyn basqa naýqasqa berip qoıǵanyn aıtty. Qamshy tilshisimen sóılesken ol isti aqyryna deıin jetkizgisi keletinin, prezıdent pen bas prokýrorǵa resmı hat jazyp qoıǵanyn jetkizdi.

"AÝRÝHANADA ADAMDAR "OTTEGI TAÝSYLDY" DEP BAIBALAM SALYP, AÝYRYP JATQAN TÝYSTARYNA BALLON ÁKELIP JATTY"

Anam Amankúl Aǵabaeva meıirbıke bolyp isteıtin. Eshqaıda qydyryp shyqpaıtyn, karantın talaptaryn qatań saqtady. Syrqatty naýqastardan juqtyryp aldy ma, áıteýir 3 shilde kúni tamaǵy aýyryp, ózin jaısyz sezindi. Biraq qyzýy kóterilip, jótel syndy belgiler bolmaǵandyqtan, em sharalaryn úıde jasaýdy sheshtik. Alaıda kúnnen-kúnge jaǵdaıy nasharlaǵan soń 7 shildede rentgenge túsirdik. Anamnan ekijaqty pnevmonııa anyqtaldy. Artynsha jedel-járdem shaqyryp, "Asar" yqshamaýdanyndaǵy jańadan salynǵan aýrýhanaǵa aparǵanymyzda tirkelýshilerdiń tiziminde anamnyń joǵyn aıtty. Dárigerlerge jalynyp-jalbarynyp, áreń degende emhanaǵa jatqyzýǵa ruqsat aldyq. Dárigerler aýrýhanada dári tapshy ekenin aıtyp, qajetti dári-dármekterdi ózimizge alýdy ótingen soń 300 myń teńgege dári satyp aldyq. Sol túni inim ekeýmiz anam jatqan reanımasııany kúzetýmen boldyq. Bir ýaqytta adamdar shýlap, "ottegi taýsyldy" dep ottegi ballonyn ákelip jatyr eken. Biz de sol túni kezekshilikte bolǵan sanıtar dárigerge ottegi toltyrylǵan ballondy ákelip bergenbiz. Ol ballondy anama qosyp bergenin aıtqan. Biz oǵan sendik.

"INIM REANIMASIIаǴA KIRIP BARǴANDA, ANAM OTTEGISIZ JATTY"

Dárigerler ottegi ballonyn aparyp bergenin, anamyzǵa jaǵdaıy jaqsy ekenin aıtqan. Biraq inim anamyzǵa kezekti ret kirgende anamnyń ottegisiz jatqanyn kórdi. Anam men birneshe adam qınalyp demalyp jatyr eken. Naýqastardyń janynda birde-bir dáriger bolmady. Biz aıqaılasyp júrip, basqa naýqasqa berilgen ballonymyzdy aldyrttyq. Ishindegi ottegi taýsylýǵa az qalypty. Sodan ekinshi ballondy alyp kelýge ketkenimizde anamnyń qaıtyp ketkenin estidik. Sol kúni anammen qatar taǵy kóptegen adam qınalyp ana dúnıege attandy. Bul shildeniń 8-inen 9-na qaraǵan tún bolatyn. Biz ottegi ballonyn anamnyń aýzynan kimniń alǵanyn anyqtaı almadyq. Dárigerler sol jerde aýyryp jatqan naýqastardyń biriniń týysy alǵanyn aıtyp otyr. Tipti solaı bolǵan kúnniń ózinde de ol jerdegi jaýapty medısına qyzmetkeri qaıda júrgen. Ol óz ornynda bolǵanda mundaı qaıǵyǵa dýshar bolmas edik qoı. Men ottegini bireý qasaqana alǵanyna senimdimin.

Marqum Amankúl Aǵabaeva

"PROKÝRATÝRA ADAM О́LIMI BOIYNShA TEKSERIS JÚRGIZÝGE TIIS"

Anamnyń jetisi ótkennen keıin úıge Shymkent qalasy ákiminiń orynbasary jáne baspasóz hatshysy kelip, bizdi sabyr saqtaýymyzdy surap, bolǵan jaǵdaıǵa keshirimmen qaraýǵa shaqyrdy, Meniń oıymsha, qazir sabyrǵa salyp, keshirimmen qarap otyratyn ýaqyt emes. Munda ákimshilikten bastap, sol kúni kezekshilikte bolǵan dárigerlerge deıin zańbuzýshylyqqa baryp otyr. О́tken senbi, 18 shildede prezıdent Qasym-Jomart Toqaevqa jáne bas prokýror Ǵızat  Nurdáýletovke resmı hat joldadym. Bul oqıǵa bir ǵana tekserispen toqtap qalmaýǵa tıis, jaýapty organdar jaýapkershilikke tartylýy kerek. Men isti sońyna deıin alyp baramyn. Prokýratýra adam ólimi boıynsha tekseris júrgizýge tıis. Eger dárigerler anamdy qutqaryp qalý úshin barlyq amaldy jasap, qoldan kelgenshe kómektesse, bulaı baıbalam salmas edim. О́zimizdiń qarajatymyzǵa satyp alynǵan ottegiden aıyrǵan emhanada úlken masqara bolyp jatyr. Áli de sol emhanada qaıtys bolyp jatqan adamdar kóp. Salǵyrttyqpen qaraǵan dárigerlerdiń jáne jaýapty basshylardyń kesirinen qanshama adam ómirimen qoshtasyp jatyr. Men óz quqyǵymdy saqtaı otyryp, jan-jaqqa barynsha jazyp, ótinish bildiretin bolamyn.