"Anań úshin aıqaılap jylaýyń kerek eken!". Shymkenttik zańger prezıdentke úndeý joldady (vıdeo)

Prezıdent janyndaǵy ulttyq qoǵamdyq senim keńesiniń múshesi, zańger Aıgúl Orynbek óziniń Facebook paraqshasynda Shymkent qalasyndaǵy aýrýhanalardyń biri qatty syrqattanyp kelgen anasyn qabyldamaı jatqanyn aıtyp, shaǵymdandy.

Jelidegi jazbasynda prezıdentten Shymkent qalasynyń ákimi Murat Áıtenov pen Densaýlyq saqtaý departamentiniń basshysy Rústem Albaevtyń ornynan ketýin talap etip, vıdeoúndeý joldady. 

– Tańnan beri anamdy aýrýhanaǵa jatqyza almaı jatyrmyn. Jedel járdemmen alyp ketip, keıinnen jedel járdem anamdy esik aldyna laqtyryp ketti. Men anamdy aýrýhanaǵa jatqyza almaı jatyrmyn, basqalaryn aıta almaımyn. Ákimdikke kelsem jaýap bermeıdi. Anamnyń eki ókpesi jaramsyz, tez arada anamdy aýrýhanaǵa jatqyzý qajettigin oblystyń dárigerleri aıtty. Anamnyń turǵylyqty meken-jaıy Shymkent qalasy. Shymkentten bolsa da, jatqyzbaı dalaǵa shyǵaryp, laqtyryp tastady. 60-qa kelgen anamdy osylaı qorlap otyr, – dedi A. Orynbek.

Onyń aıtýynsha qazirgi ýaqytta anasynyń densaýlyǵy nashar jáne aýrýhana basshylary úıge qaıtaryp otyr.

– 5 mlrd-qa salynǵan juqpaly aýrýhana kim úshin salyndy?! Baı-baǵlandar, ákimder úshin salyndy ma, ıa mınıstr, prezıdent úshin salyndy ma?! Qarapaıym halyq ne isteıdi?! Maǵan ne úshin ekenin bireý shyǵyp, jaýap bersin, – dep talap qoıdy Aıgúl Orynbek. 

"5 mıllıardqa salynǵan aýrýhanasynda reanımasıonnyı joq eken!"

Anamdy jedel járdem qaıtadan alyp ketti. Tek osylaı ınternetke shyǵyp "Anań úshin aıqaılap jylaýyń kerek eken!" Azannan beri ókpesin rentgenge túsirip, háliniń nashar ekenin, dáriger emes, men túsinip turmyn! Túrkistan oblystyq aýrýhanasy shuǵyl túrde aýrýhanaǵa jatqyzý kerek ekenin aıtqan soń birden skoryı shaqyrdyq. Sóıtsek ol jaq analız bolmaı qabyldamaıdy dep birden aıtty. Anamnyń ókpesi 75% jaramsyz dedi vrach.

Jańa aýrýhana da reanımasıonnyı joq, eskige aldyramyz dedi. Osylaı sandalyp júrgenimizge alty saǵattan asty! Jańa aýrýhanada reanımasııa joq bolsa, ony kórmege salyp qoıdyńdar ma?

Prezıdent Q Toqaev myrza!

Bizdiń Shymkent qalasyndaǵy aýrýhana siz kelip lentasyn qııý úshin salynǵan eken.

Ol jaqta reanımasııa joq!

Bir-birine jumsap, bir-birine laqtyryp "oblysqa qaraımyz", "qalaǵa qaraımyz" dep qarapaıym halyqty ıttin shyǵarady!

Osylaı júrgende adam ólip ketse she?" dep jazdy zańger.