Maman koronavırýs juqtyrǵanda qandaı dárilerdi ishý keregin aıtty

Nur-Sultan qalasy qoǵamdyq densaýlyq saqtaý basqarmasynyń basshysy Sáýle Qısyqova turǵyn COVID-19 vırýsyn juqtyrsa, ne isteý keregin túsindirdi, dep habarlaıdy Tengrinews.kz.

"Koronavırýsty anyqtaýǵa test tapsyryp, ol oń nátıje kórsetse sizderge ne isteý keregin aıtaıyn. Birinshiden, úıden shyqpańyzdar, oqshaýlanyńyzdar. Maska taǵyńyzdar. Ekinshiden, kúnine 3 ret termometrııa júrgizińizder. Úshinshiden, jeke bastyń tazalyǵyn saqtańyzdar. Tórtinshiden, siz tamaq ishetin ydystar jeke bolýy kerek. Bólmeni jeldetip otyryńyzdar", - dedi ol ortalyq kommýnıkasııalar qyzmetinde ótken baspasóz máslıhatynda.

Sondaı-aq, Sáýle Qısyqova dene temperatýrasy kóterilse, qandaı dári ishý keregin túsindirdi.

"Dene qyzýy 38 gradýstan joǵary bolsa, 500 mıllıgramm mólsherinde parasetamol jáne kúnine 1 ret aspırın ishińiz. Onyń dozasy 150 mıllıgramm bolýy kerek. Sonymen qatar, qandy suıyltý úshin tabletka túrindegi Trombo ASS, kardıomagnıl sııaqty dárilerdi ishýi kerek", - dedi ol.

Basshy koronavırýs ınfeksııasy kezinde dene qyzýy 3-5 kún boıy kóteriletinin jetkizdi. Ol mundaı jaǵdaıda úıde emdelmeý keregin aıtty.

"Mundaı jaǵdaıda jedel járdem qyzmetiniń nemese polıklınkalardyń call-ortalyǵyna habarlasý kerek", - dedi Sáýle Qısyqova.

Aıta keteıik, osyǵan deıin Nur-Sultan qalasy qoǵamdyq densaýlyq saqtaý basqarmasynyń basshysy elordada epıdemıologııalyq ahýal nasharlaǵanyn habarlaǵan bolatyn.

Aıta keteıik, Qazaqstanda indet juqtyrǵandar sany 15 552-ge jetti. 2 647 adam aýrýdan jazyldy, 88 naýqas kóz jumdy.