Ilıashevtiń isi: Advokat sýdıaǵa qarsy shyqty

Búgin Almaty qalasy Medeý aýdanynyń №2 sotynda tótenshe jaǵdaı kezinde "Jalǵan aqparat taratty" (QR QK 274-baby 4-bóliginiń 2-tarmaǵy) dep aıyptalǵan belsendi Álnur Ilıashevtiń isin qaraý jalǵasty.

Sot prosesi taǵy da "TrueConf" qosymshasy arqyly onlaın rejımde ótti. Ilıashev jáne onyń  advokattary Vıtalıı Voronov, Taır Nazhanov jáne Nurlan Rahmanov baılanys sapasynyń nashar ekenin atap aıtqan. Nazhanov baılanys sapasy jaqsarmaıynsha sot prosesin keıinge qaldyrýdy surady. Ilıashevtiń ózi sot prosesi oflaın rejımde ótýi úshin karantınniń aıaqtalýyn kútýge daıyn ekenin birneshe ret málimdegen.

Advokat Voronov óz sózinde is materıaldarymen áli tanys emestigin atap ótti. Ol sondaı-aq sot Ilıashevke bilikti qorǵanys quqyǵyn qamtamasyz etýge mindetti ekenin atap aıtty.

– Qurmetti sot, siz muny qalaı isteısiz, men bilmeımin, biraq siz ony qamtamasyz etýińiz kerek. Áıtpese, bul shyǵarylǵan úkimniń zańdylyǵyna kúmán keltiredi jáne bizdiń qorǵaýshy retindegi quqyqtarymyzdy buzady, – dedi Voronov sýdıaǵa.

Advokat Nurlan Rahmanov áriptesin qoldap, bylaı dedi:

"Men sizden sot otyrysyn onlaın rejımde emes, offlaın rejımde ótkizýdi jáne bizdiń qorǵalýshymen tikeleı qarym-qatynas jasaýǵa múmkindik berýdi suraımyn".

Osy eskertýlerge qaramastan, sýdıa sot tergeýine kóshti. Advokat Voronov buǵan ashýlanyp, sýdıany qyzmetinen bosatý týraly aýyzsha ótinish bildirdi.

– Advokattyń is materıaldarymen tanyspaýy jaǵdaıynda sot tergeýine kóshý meniń qorǵaýshymnyń qorǵalý quqyǵyn óreskel buzý bolyp tabylady. Men sotqa senimsizdik bildiretin sebepter bar dep sanaımyn. Sot ádil ótkenine kúmánim bar, meniń oıymsha, sot konstıtýsııalyq normalardy jáne QIJK-ni (qylmystyq is júrgizý kodeksi) buzý arqyly bizdiń qorǵalýshymyzdy aıyptaýǵa tikeleı nemese janama múddeli. Sondyqtan men sizge senimsizdik jáne qarsylyq bildiremin, – dedi Voronov.

Sýdıa Maharadze sot otyrysyn keıinge shegerýdi qajet dep sanady.

Ilıashevti jaqtaýshylar toby Almaty qalalyq sotynyń ǵımaratyna «Álnur Ilıashevke bostandyq» degen jazýmen shyqty. Belsendiler azamattardyń quqyǵyn buzatyn onlaın-sottarǵa qarsy ekenin  aıtty.

Eske sala keteıik, 18 sáýirde Almaty qalalyq tergeý soty belsendi Álnur Ilıashevti eki aıǵa qamaý týraly qaýly shyǵarǵan.