Toqaev: Bilim salasyna bólinetin qarjy 6 esege artady

Prezıdent Q.Toqaev 2025 jylǵa qaraı elde bilim salasyna bólinetin qarjy 6 esege, ǵylymǵa bólinetin qarjy 7 esege artatynyn aıtty.

– Qazaqstan bilim salasynda kóptegen kórsetkishter boıynsha álem elderinen artta keledi. Bul – eń birinshi kezekte atalǵan salaǵa bólinip kelgen qarjynyń azdyǵynan. Qazaqstan ár bilim alýshyǵa ortasha eseppen jylyna 1 myń dollar jumsaıdy. Al bilim salasy boıynsha ozyq ondyqtaǵy elder árbir bilim alýshyǵa 10 myńnan 14 myń dollarǵa deıin jaratady. Osyny eskerip, 2025 jylǵa qaraı elde bilim salasyna bólinetin qarjy 6 esege, ǵylymǵa bólinetin qarjy 7 esege arttyrylady, – dedi prezıdent ulttyq qoǵamdyq senim keńesiniń onlaın formattaǵy otyrysynda.

Onyń sózinshe, bilim sapasyn kóterýde ınfraqurylymdy damytý asa mańyzdy. Sondyqtan synyptarda oqýshylardyń sany az bolýǵa tıis. Bul maqsatta 2025 jylǵa deıin elde jańadan 800 mektep, 114 ınternat turǵyzylady.

Prezıdent sondaı-aq qala men jáne aýyldyq mektepterindegi bilim sapasy arasyndaǵy alshaqtyqty jaqyndatý kerektigin atap ótti. Búginde alshaqtyq 1 jarym jyldy quraıdy.

– Ol úshin aýyl mektepterin bilikti kadrlarmen qamtamasyz etý kerek. Dıplommen aýylǵa baǵdarlamasyn jasadyq. Biraq ol boıynsha jastar aýylǵa kóptep baryp jatqan joq. Sondyqtan aýyl ustazdarynyń eńbekaqysyn kóbeıte túseý kerek, – dedi memleket basshysy.