QMDB: «Myń aıdan da qaıyrly Qadir túni» onlaın baǵdarlamada ótti

Keshe Qazaqstan musylmandary dinı basqarmasynyń «Hıkmet» stýdııasy Qasıetti Qadir túniniń qurmetine dinı basqarmanyń Youtube kanaly jáne Instagram-daǵy paraqshasy arqyly 00:30-dan 02:40-qa deıin «Myń aıdan da qaıyrly Qadir túni» atty onlaın baǵdarlamasyn ótkizdi. 

Tikeleı efır QMDB Tóraǵasy, Bas múftı Naýryzbaı qajy Taǵanulynyń Qadir túnine arnalǵan quttyqtaý sózimen ashylsa, Myrzataı Joldasbekov, Ǵarıfolla Esim, Baqytjan Ertaev t.b el aǵalary merekelik lebizin bildirdi.

Sonymen qatar, respýblıkalyq «Áziret Sultan» meshitinde 24 sáýirde bastalǵan  «Ramazandaǵy Quran hatym» atty onlaın hatym oqý sharasy túıindeldi. Baǵdarlama barysynda kópke tanymal qarı Jumanazar Sadyrhanov Quran aıattaryn oqysa, QMDB tóraǵasy, Bas múftı Naýryzbaı qajy Taǵanuly Quran hatym duǵasyn jasap, Alla Taǵaladan elimiz ben jerimizdiń amandyǵyn surap, izgi tilek tiledi.

Keıin onlaın baǵdarlamada Qadir túnindegi qulshylyq pen duǵa jóninde beınerolık usynylsa, «Áziret Sultan» meshitiniń bas ımamy Erbolat Júsipov «Qulshylyq jasaýdaǵy yqylas-nıettiń orny», QMDB Ýaǵyz-nasıhat bóliminiń meńgerýshisi Batyrjan Mansurov «Zikir, salaýat jáne tasbıh aıtýdyń artyqshylyǵy», QMDB Dinı bilim jáne kadr daıarlaý bóliminiń meńgerýshisi Smaıyl Seıtbekov «Islam – meıirim dini» taqyryptarynda ýaǵyz-nasıhat aıtty.

Buǵan qosa, QMDB sharıǵat jáne pátýa bóliminiń mamany Medet Qursaqov kórermender tarapynan qoıylǵan din taqyrybyndaǵy suraqtarǵa jaýap berdi.