Aqtaý áýejaıynyń jumysy 16 mamyrdan bastap qaıta jandanady

Aqtaý áýejaıynyń jumysy 16 mamyrdan bastap qaıta jandanady. Bul týraly búgin Mańǵystaý oblysynyń qoǵamdyq kommýnıkasııa ortalyǵynda ótken brıfıngte Aqtaý halyqaralyq áýejaıynyń dırektory Erǵazy Joldasov málimdedi.

Memlekettik komıssııanyń sheshimi boıynsha Aqtaý áýejaıy 16 mamyrdan bastap ishki áýe reısterdi qabyldaıdy.
«Air Astana» áýe kompanııasy burynǵy ushý kestesi boıynsha «Aqtaý-Nursultan» jáne «Aqtaý-Almaty» baǵyty boıynsha kúnine bir ret jolaýshylardy tasymaldaıdy. Al, «Sckat» áýe kompanııasy «Aqtaý-Almaty» baǵyty boıynsha kún saıyn bir ret, al «Aqtaý-Shymkent» baǵyty boıynsha aptasyna eki ret jolaýshylardy tasymaldaıtyn boldy. Elimizdiń barlyq qalalaryna ushatyn reıster iske qosylady.
Tek qana Atyraýdaǵy pandemııalyq jaǵdaıǵa baılanysty «Aqtaý-Atyraý» reısteri ázirge ushpaıdy. Sonymen qatar shet memleketterge baǵyttalǵan áýe reısteriniń qashan iske qosylatyny da ázirge belgisiz.
Reıster áýejaı algorıtmine, kúsheıtilgen sanıtarlyq normalarǵa, sondaı-aq borttaǵy qaýipsizdik erejelerine sáıkes oryndalady.

Qaýipsizdik erejeleri:
1. Araqashyqtyq saqtaý. Tirkeý, tekserý, otyrý men túsý kezinde jolaýshylardyń (1 metr) araqashyqtyq saqtaýy qajet.
2. Termometrmen ólsheý. Termınalǵa kirgende jolaýshylardyń dene qyzýy tekseriledi.
3. Jeke qorǵanysh quraldaryn paıdalaný. Ushaqqa otyrǵanǵa deıin jáne ushý kezinde jolaýshylardyń betperdesi bolýy tıis.
4. Jolaýshylar ushýdan 2 saǵat buryn áýejaıda bolýy qajet.
5. Shyǵaryp salýshylar jáne kútip alýshy adamdar termınal ǵımaratyna kire almaıdy.

Áýe reısteri týraly tolyq aqparatty áýe kompanııalaryna habarlasyp bile alasyzdar.