Aqtóbede jol jóndeý jumystary qyzý júrip jatyr

Aqtóbe oblysynyń ákimi Ońdasyn Orazalın qala ishinde jalpy kólemi 19,611 km-di quraıtyn Batys-2 sh.a, Zarechnyı-3, Sáńkibaı batyr kóshesi(Moldaǵulova kóshesinen 12sh/a-ǵy aınalmaǵa deıingi aýmaq), Bókenbaı batyr, J.Dosmuhameduly, Zavodskaıa, Zınchenko, Garnızonnaıa kóshelerindegi júrgizilip jatqan joldardyń jóndelý barysyn baqylady. Aqtóbede avtokólik joldarynyń uzyndyǵy 651km, onyń 300 km asfaltty betonmen jabdyqtalǵan. Jalpy sany 97 kósheni jóndeý jospary jasalǵan. Karantındik rejımge qaramastan Aqtóbede qurylys jumystary jalǵasty.

Qazirgi tańda 30 kóshede jóndeý jumystary bastalyp ketti. Uzyndyǵy 5,3 km quraıtyn Arynov, Sáńkibaı batyr, Máńgilik el kóshelerine qaıta jańǵyrtý jumysy júrgizilýde. Ol úshin 2,133 mlrd tg bólingen. Al,135,3 km jolǵa kúrdeli jáne orta jóndeý júrgiziledi. Ol úshin 11,337 mlrd qaralǵan. Z km jol jańadan salynady. Jalpy 2020 jyly jumyspen qamtý jol kartasy sheńberinde qala jáne qala shetindegi kólemi 171 km bolatyn eldimekenderdiń joldaryn jóndeýge respýblıkalyq bıýdjetten 13,9 mlrd tg bóliný josparlanǵan.

Bul óz kezeginde 2170 jumys oryndarynyń ashylýyna múmkindik beredi. Qazirgi tańda memlekettik satyp alý konkýrsynan ótken «Progress kz», «AqtóbeKapRemstroı», «ASSANA-DorStroı», «ErhatJoldary», «IntehsentrLTD», «Aqto'be Qurylys Engineering» JShS-gi merdiger mekemeler jóndeý jumystarymen aınalysýda. Memlekettik satyp alý prosessi mamyr aıynyń ortasynda tolyq aıaqtalady. Sol ýaqytta ózge de merdiger mekemeler belgili bolmaq. Atalǵan joldarǵa jaıaý júrginshilerge arnalǵan trotýar, velojoldar, Led jaryqtandyrý, kógaldy shóp tóseý syndy sharalar jasalady. Sáńkibaı batyr kóshesindegi jóndeý jumystary bir jaq betinde júrgizilip, ekinshi jaǵynan avtokólikterdiń júrýine múmkindik berilgen. Jumystyń tym baıaý júrip jatqandyǵyn baıqaǵan aımaq basshysy Sáńkibaı batyr kóshesinen kólikterdiń júrýin toqtatyp jumysty qarqyndatýdy tapsyrdy. 

Aıtyp óteıik, buǵan deıin sýaǵar júıesi Bókenbaı batyr kóshesiniń bir jaq betinde ǵana bolatyn, ortasha jóndeý jumysy barysynda sýaǵar ekinshi jaǵyna da salynatyn bolady. Bul óz kezeginde jańbyr, qardan jınalǵan sýdyń aǵyp ketýine múmkindik berip, joldyń uzaq saqtalýyna septigin tıgizedi. Joldardyń sapasy «Jol aktıvteriniń ulttyq sapa ortalyǵy» mekemesi mamandarynyń qatań baqylaýynda. Jyljymaly zerthana tehnologııanyń saqtalýyn tekseredi. Oblys ákimi Ońdasyn Orazalın qala basshysy Ashat Shaharovqa kólikterdiń retsizdigin boldyrmaýdy, jol jóndeý jumystarynyń sapaly ári ýaqytynda aıaqtalýyn qadaǵalap otyrýdy tapsyrdy.