Almatyda «Jańa Alataý qory» esebinen 12 000 adam azyq-túlik qorjynyn aldy

Almatyda «Jańa Alataý qory» esebinen 12 000 adam azyq-túlik qorjynyn aldy. Bul týraly qala ákimdiginiń baspasóz ortalyǵynda ótken onlaın-brıfıngte qamqorshylar keńesiniń tóraǵasy Rahman Alshanov málimdedi.

– Búgingi tańda Almaty qalasy aýmaǵynda tótenshe jaǵdaıdyń engizilýine baılanysty qala halqynyń osal toptaryna jan-jaqty áleýmettik kómek kórsetý jumystary jalǵasýda. О́zderińiz bilesizder, "Jańa Alataý" qoǵamdyq qoryna alǵashqylardyń biri bolyp QR Tuńǵysh Prezıdenti – Elbasy Nursultan Nazarbaevtyń qorynan 100 mln tg qarajat kelip túsken bolatyn. Oǵan qosymsha atalmysh qorǵa depýtattar men kásiporyndardan, depýtattar men kásipkerlerden 256 mln qarajat tústi. Búgingi tańda bul qarjynyń 136 mln tg jumsaldy. Muqtaj jandarǵa 17 000 azyq-túlik qorjyndary taratyldy. 8 áleýmettik uıymdarǵa, sonyń ishinde, 6 ınternatqa, jastar qoǵamdyq úılerine, múgedekterge, zeınetkerlerge, kópbalaly analarǵa, ardagerler men áleýmettik úılerge kómek kórsetilip jatyr. Túsip jatqan qarajattar áleýmettik mańyzy bar sharalarǵa jumsalýda, – dedi R. Alshanov.

Spıker áleýmettik kómek alyp jatqan jandar qatarynan eshqandaı shaǵym túsip jatpaǵanyn aıta kelip, kerisinshe, rızashylyqtaryn bildirip jatqan oqyrmandardyń kóp ekenin jetkizdi. Máselen, 291 estý qabileti nashar jandar atynan alǵys hat joldaǵan Amanbek Erǵalıevtiń hatynda muqtaj jandarǵa qajet kezinde kómek qoldaryn sozyp, azyq-túlik qorjynyn jetkizip bergenderi úshin alǵys aıtylǵan.

– Osyndaı mazmundaǵy hattar bizge kóptep kelip jatyr. Kómek kórsetiletin adamdardyń tizimi shektelmeıdi, biz olardyń suranystaryn eskerip, jumys atqaryp jatyrmyz. "Jańa Alataý" qory budan bylaı muqtaj jandarǵa áleýmettik kómekti, ásirese azyq-túlik jıyntyǵyn voloenterler emes, «Qazposhta» AQ arqyly jóneltedi. Sebebi, qorda jumys kóp, Ondaǵy muqtaj jandarǵa beriletin qorjyndardy ólshep-oraý jumystaryn osy volonterler atqaratyn bolady. Kómek kórsetýge bólinetin qarajat ardagerlerdi, múgedekterdi, ınternasıonalıst-jaýyngerlerdi biriktiretin ár túrli uıymdar arqyly júrgiziledi, – dedi spıker.

R. Alshanov bólingen qarjylar men olardyń jumsalýy mindetti túrde ashyq bolatynyn aıta kelip, qazirgi ýaqytta áleýmettik qamsyzdandyrý organdary kómekke óte muqtaj adamdardyń tizimderin jasalyp jatqanyn jetkizdi. Ol úshin atalmysh qordyń kómegine muqtaj jandar ózi turatyn aýdannyń ákimdigine, ardagerler keńesine, múgedekter qoǵamyna baryp, qoldaýdy qajet etetin qala turǵyny retinde tirkelý qajettigin aıtty.

– Osynaý ıgilikti iske nıet bildirgen jandardan qaıyrymdylyqty qabyldaımyz. Ol úshin ınternet arqyly bizben habarlasyńyz. Biz syn saǵatta kómek qolyn sozǵan jandardyń barlyǵyna alǵys aıtamyz, – dedi Alshanov.