Toqaev koronavırýstan qaıtys bolǵan áıel adamnyń jaqyndaryna kóńil aıtty

Qazaqstan prezıdenti Qasym-Jomart Toqaev búgin koronavırýstan qaıtys bolǵan áıel adamnyń týystaryna kóńil aıtty.

"64 jastaǵy áıeldiń koronavırýstan qaıtys bolýy – bul indettiń asa qaýipti ári karantın tártibin saqtaý óte mańyzdy ekenin kórsetti. Týǵan-týystaryna kóńil aıtamyn. Elorda men Almatyda karantın sharalaryn kúsheıtip, Shymkentte shekteýler engizý jóninde sheshim qabyldandy. Osyndaı qajetti shara qoldanýǵa májbúrmiz. Epıdemııany bárimiz birge jeńemiz. Odan sabaq alyp, tıisti qorytyndy jasaımyz" dep jazdy prezıdent.

Búgin, 26 naýryzda Qazaqstanda koronavırýs juqtyrǵan bir adamnyń qaıtys bolǵany belgili boldy. Bul – elde osy indetten qaza tapqan alǵashqy adam. 

Sońǵy derek boıynsha, elde 13 naýryzdan beri 111 adam koronavırýs ınfeksııasyn juqtyrdy. Olardyń ekeýi dertinen aıyqty. Indet juqtyrǵandardyń basym bóligi Almaty men Nur-Sultanda. 

Koronavırýsqa baılanysty Qazaqstannyń barlyq aýmaǵynda 16 naýryzdan 15 sáýirge deıin tótenshe jaǵdaı. Al Almaty men Nur-Sultan 19 naýryzdan bastap karantınge jabylǵan. Bul qalalarǵa kirip-shyǵýǵa tyıym salynǵan. Búginnen bastap qala ishinde azyq-túlik dúkenderi men dárihanalar ǵana jumys istep tur.