"Basqasha sóılesetin bolamyz". Saparbaev jambyldyq sheneýnikterdi qatań synady

Belgili bolǵandaı, Berdibek Saparbaev oblystyq ákimdikte ótken apparattyq keńeste áleýmettik salaǵa jaýapty basqarmalardyń jumysyn synǵa alǵan. Sebebi, áli kúnge deıin kepildi áleýmettik kómek berilmeı keledi munda.

«Eger osy aptada áleýmettik paketterdi berý sharasy naqty qolǵa alynbasa, basqasha sóılesetin bolamyz», dedi aımaq basshysy jumyspen qamtýdy úılestirý jáne áleýmettik baǵdarlamalar basqarmasynyń basshysyna.

Sondaı-aq Berdibek Máshbekuly óńirdegi mádenıet, sport salasynda da jumys aqsap turǵanyn, óz eli óz kemeńgeri men maqtanyshqa aınalǵan tulǵalaryn eskere almaı otyrǵanyn, tipti, Abaıdyń 175 jyldyǵyn toılaýdyń ózi tómen deńgeıde ótip jatqanyn aıtyp ótken.

Budan soń jastar máselesine basa mán berý kerektigin, ol úshin aýyldyq jerge deıin sport úıirmeleri ashylýy, ol úshin arnaıy shtattar taǵaıyndalýy kerektigin de jetkizdi.  

«Jastar nege qoǵamdyq tártipti buzady? Úıi men kúıi bolmaǵandyqtan! Eger olarǵa arnalyp ár túrli demalys sharalary uıymdastyrylyp otyrsa, olardyń buzaqylyq jasaýǵa ýaqyty bolmaıdy», - dedi B. Saparbaev.

Ol ol ma, sý jańa ákim eriktilerdiń tek kóshelerdi tazalaý jáne qarııalarǵa kómek kórsetýmen ǵana shektelip qalmaýy kerek ekenin atady.

Dálirek aıtqanda, bıylǵy jyl ıeleri ómirdiń barlyq salalaryna tartylýy tıis deıdi. Ári "ámbebap" topqa álgindeı sharýalardy bólip berý isin ishki saıasat basqarmasy uıymdastyryp, baqylap otyrýy mindettedi.

«Adamnyń ál-aýqaty men kóńil-kúıi onyń áleýmettik máseleleriniń sheshilýine, memlekettik qyzmet kórsetýdiń sapasyna baılanysty. Munyń bári oıdaǵydaı atqarylsa, turǵyndar tarapynan narazylyqtar bolmaıdy», - deıdi Berdibek Saparbaev.