Ushaq apaty: Premer-mınıstrdiń orynbasary resmı málimdeme jasady (vıdeo)

Qazaqstan premer-mınıstriniń orynbasary Roman Sklıar Almatydaǵy ushaq apatynan qaza bolǵandar sany 15 emes, 12 adam ekenin aıtty. Bul týraly ol Almaty áýejaıynda ótken baspasóz jıynynda málimdedi.

– Apat saldaryna barlyǵy 12 adam qaza tapty. Olardyń segizi oqıǵa orynynda qaza tapsa, ekeýi aýrýhanada, taǵy eki adam Almaty áýejaıynda kóz jumdy. Almaty oblysy men qalasynyń aýrýhanalaryna barlyǵy 49 adam jetkizildi. Olardyń 18 aýyr halde, – dedi Sklıar.

Buǵan deıin BAQ-ta qaza tapqandar sany 15-ke jetkeni habarlanǵan. Premer-mınıstrdiń orynbasary bul aqparatty joqqa shyǵardy. 

Sklıar ushaqtyń apatqa ushyraý sebebiniń alǵashqy nusqalaryn týraly da aıtty. 

– Ushar kezde áýe kemesi eki ret ushý-qoný jolaǵyna soqtyqqan. Ushý-qoný jolaǵy aıaqtalǵannan keıin áýe kemesi ońǵa burylǵan. Shassı (ushaq dóńgeli – red.) bul ýaqytta jınaqtalyp qoıǵan. Ushaq ushyp ketpek bolǵanymen oń jaqqa aýyp ketip, jeke úıdiń qorshaýyna soǵylǵan. Úıde eshkim bolmaǵan. Ushaq soqtyǵys saldarynan ekige bólinip ketken. Bul ushqyshtyń kinásinen boldy ma, álde tehnıkalyq aqaýdan ba, anyqtalý ústinde. Negizinen ushaqtyń aldyńǵy jaǵynda otyrǵan jolaýshylar kóz jumǵan. Qaza tapqandardyń otbasy men zardap shekkenderge materıaldyq kómek kórsetiledi, – dedi  Sklıar.                                                 

Búgin,  27 jeltoqsan kúni tańerteń Almaty áýejaıy mańyna Bek Air áýe kompanııasynyń Fokker-100 ushaǵy qulady. Ushaqta 93 jolaýshy men bes ekıpaj múshesi bolǵan. Jolaýshylar arasynda Ýkraınanyń eki azamaty, Qyrǵyzstannyń bir azamaty, Qytaıdyń bir azamaty bar.

Qoǵamdyq densaýlyq saqtaý basqarmasynyń málimetinshe, barlyǵy 66 adam aýrýhanaǵa jetkizilgen, 50 adam aýrýhanaǵa jatqyzylǵan. Dárigerler olardyń keıbirniń jaǵdaıy aýyr ekenin aıtty. 

Qazaqstan prezıdenti Qasym-Jomart Toqaev  Almatydaǵy ushaq apatyna baılanysty 28 jeltoqsandy jalpyulttyq aza tutý kúni etip jarııalady.