Almatyda sýyq sý qymbattamaıdy

Almatylyqtar úshin sýyq sý tarıfy 2025 jylǵa deıin ózgermeıdi. Al káriz qyzmetiniń tólemi ósýi múmkin. «Almaty sý» MKK tarıftik saıasat jobasyn qoǵamdyq tyńdaýlarǵa usyndy.

Qazaqstan boıynsha Almatyda sýyq sý men káriz qyzmetiniń tólemi tómen tarıfter qatarynda. Turǵyndarǵa sýyq sýdyń aqysyn 2025 jylǵa deıin 1 tekshe metrine 50,01 teńge qylyp qaldyryp, al káriz qyzmetin 25,92 teńgeden 33,69 teńgege deıin kóterýge usynys jasaldy.

«Sońǵy ret tarıfter 5 jyl buryn 2014 jyldyń qańtar aıynda qabyldandy. Sodan beri qymbattaǵan joq. Qoldanystaǵy tarıf merziminiń kelýine baılanysty, kommýnaldyq kásiporyn qoǵamdyq tyńdaýlarǵa tarıftik jobany usynyp otyr, maquldanǵannan keıin tarıfter taǵy 5 jyl ózgerissiz qalady. Qalanyń tarıfi áleýmettiń yńǵaıyna baǵyttalǵan», – dep habarlady «Almaty sý» MKK.

«Almaty sý» kásiporyny zańdy tulǵalarǵa 152,73 den (qazirgi tarıf) 168,01 teńgege deıin, káriz qyzmetine 52,61 teńgeden (qazirgi tarıf) 68,39 teńgege kóterý týraly usynys joba jasady. «Tarıfterdiń ózgergeni kásiporynǵa salyq júktemesimen, tozyǵy jetken jabdyqtarmen, qubyrlardy jańartý maqsatynda, qyzmetkerlerdiń eńbek aqysyn kóterýge baǵyttalǵan», – dep málimdedi «Almaty sý» MKK.

Kásiporyn tutynýshylarǵa qyzmet kórsetý sapasyn jaqsartýdy, modernızasııalaý, tehnologııalardy avtomattandyrý, Almaty qalasynyń sý men káriz qyzmetiniń óndiristik prosessterin ary qaraı damytýdy josparlap otyr.

Kommýnaldyq tólemder baǵanynda sýyq sý men káriz qyzmetiniń úlesi 4-5 paıyzdan aspaıdy. Sýyq sý men kárizge almatylyq bir otbasynyń tólemi 600-700 teńgeni quraıdy.