"Juldyzdar" jappaı lotoreıa oınatýda. Oǵan dinde ne delingen?

Belgili dintanýshy Qaırat Joldybaı óziniń facebook-tegi paraqshasynda áleýmettik jeliler arqyly lotoreıa oınatý derekterine qatysty ıslam dininde ne delingeni jóninde aıtty.

"Búginde áleýmettik jelide ártúrli lotereıa oınatý modaǵa aınalyp otyr. Biri eski kóligin, úıin qymbat baǵaǵa satýdy amaldasa, endi biri oqyrmanynyń sanyn kóbeıtýdi kózdeıdi. Jurt áıteýri ońaı oljadan úmitti. Biraq qarymyna eshnárse alynbaı oınatylǵan kez-kelgen lotereıa túriniń sharıǵatta haram ekenin, qumar oıynǵa jatatynyn oınatqandar da, aqshasyn salyp qatysqandar da bilýge tıis. Mysaly, myń adam qatysyp, olardyń jınaǵan aqshasyna alynǵan syılyqqa birneshe adamnyń ǵana ıelik etýi ádildikke jatpaıdy. Oıynǵa qatysqan adamdardyń aqshalaryn rızashylyqpen berýleri bul isti aqtap ala almaıdy.

Biraq myna jaǵdaıdy budan bólek qarastyrýǵa bolady. Eger kisi qandaı da bir zatty naryqtaǵy naqty qunyna satyp alsa, sosyn satýshy tarap ózderiniń paıdasynan utys oınatyp, júlde tikse, bul haram emes. О́ıtkeni bul jerde ár adam óziniń aqshasynyń qarymyna zat satyp alyp tur. Al oınatylǵan júlde satýshynyń paıdasynan beriledi.

Bul jerde satyp alynǵan zattyń naryqtaǵy baǵasyna saı bolýy mańyzdy. Áıtpese, eki myń teńgelik taýardy 7000 teńge satý da aram isti adal jasaýdyń amaly ǵana. Lotereıany saýdamen búrkemeleýge jatady".