• USD 389.52
  • EUR 429.21
  • RUB 6.07
  • CNY 54.94
30 Qańtar, 04:11:02
Qazaqstan Ýkraınanyń saýda naryǵyna alańdaýly

31 Qazan, 2019 NEWS

Frılanserler, qurylysshylar, taksı júrgizýshileri saqtandyrý júıesine qalaı qatysady?

2017 jyldyń 1 shildesinen 2019 jyldyń 25 qazany aralyǵynda Áleýmettik medısınalyq saqtandyrý qoryna 222,3 mlrd teńge jarna tústi. Onyń 213,4 mlrd teńgesi jumys berýshilerdiń aýdarymdary bolsa, qalǵan 8,9 mlrd teńgesi – jeke kásipkerler men azamattyq-quqyqtyq kelisimshart negizinde eńbek etetin tulǵalarǵa tıesili. Bul týraly Almaty ákimdiginde ótken brıfıngte «Áleýmettik medısınalyq aqtandyrý qory» KEAQ Almaty fılıaly dırektory Tileýhan Ábildaev habarlady.

Almaty qalasy jarnalar men aýdarymdardyń kólemi jaǵynan respýblıka boıynsha kósh bastap tur. Jınalǵan somanyń besten bir bóligi ońtústik astanalyqtarǵa tıesili. Jalpy 2017 jyldyń shildesinen 2019 jyldyń 25 qazanyna deıingi aralyqta Almaty qalasynan qorǵa 45,9 mlrd teńge jarna aýdaryldy. Onyń 43,4 mlrd teńgesi – jumys berýshilerdiń qaramaǵyndaǵy jumyskerleriniń atyna jasaǵan aýdarylymdar.

Saqtandyrý tólemderi turaqty aýdarylmaǵandyqtan halyqtyń 7%-ǵa jýyǵy «saqtandyrylmaǵan» bolyp sanalady. Qazir elimizde ózin-ózi jumyspen qamtyǵan 1,1 mln adam bar. Olardyń da saqtandyrý júıesine qatysýǵa múmkindigi bar. Naqtyraq aıtqanda, resmı jumys istemeıtin, jeke kásipker retinde tirkelmegen, azamattyq-quqyqtyq kelisimshart negizinde qyzmet kórsetpeıtin tulǵalar óz betinshe jarna tóleı alady. Jarna mólsheri eń tómengi jalaqynyń 5%-yn quraıdy. Nemese biryńǵaı jıyntyq tólem tóleýge bolady.

Biryńǵaı jıyntyq tólem elimizde 2019 jyldyń 1 qańtarynan bastap engizilgen bolatyn. Jıyntyq tólemniń ishinde ózge de áleýmettik tólemderge qosa saqtandyrý jarnasy da bar. Ol jalpy somanyń 40 paıyzyn quraıdy. BJT – respýblıkalyq mańyzy bar qalalar úshin 1 aılyq eseptik kórsetkish (AEK) nemese 2525 teńge, aýyldyq jerler úshin – 0,5 AEK nemese 1263 teńge kóleminde belgilengen. Tólemniń bul túrin frılanserler, santehnıkter, qurylysshylar, taksı júrgizýshileri t.b. tóleı alady.

– Qazirgi tańda qalada statýsy anyqtalmaǵan 55 myńnan astam azamat turady. Búgingi kúnge deıin barlyǵy 5,9 myń adam biryńǵaı jıyntyq tólem tólegen, – dedi Almaty qalasy Áleýmettik ál-aýqat basqarmasy jetekshisiniń orynbasary Danııar Álkebaıuly.

Esterińizge sala ketsek, biryńǵaı jıyntyq tólemdi Egov portaly arqyly onlaın rejımde, sondaı-aq kez kelgen ekinshi deńgeıli bank pen «Qazposhta» bólimsheleri arqyly tóleýge bolady.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir